25.7 C
Tura
spot_img

EMRI-o kam ka•enggiparangni dabianirangko knachakjaenganina jinma re•jome jingjengata

Must read

Shillong, Jan 19: Meghalaya a·dokni GVK EMRI-o kam ka·enggipa manderangni dingtang dingtang dabianirangko knachakjaengani gimin da·al Mongolbar salni bako Meghalaya EMRI Workers Union, jinma re·jomaniko ong·atangenba, EMRI management-ni kosako jegalanirangko dakangtokaha.

Koborko on·ani gitade, EMRI-o kam ka·enggiparang gimik ming 36 dabianirang gnangchim aro ia ming 36 dabianirangoniko komibeoba mingchet dabianirangkode chu·sokate on·china jinma re·jome dabiangtokaha.

EMRI-o kam ka·enggiparangni mingchet dabianirangara kam ka·ani somoi, kam ka·ani niamrang, chutti ra·ani niamrang, dormahako chu·gimik namdapatchina, bilsio 30 percent-ko bariatchina, 2017 bilsioni bangki dongenggipa arrear-rangko on·china, ambulance-rangko taridapchina aro kam ka·enggipa me·chikrangna naljokanirangko on·anian ong·achim.

Iani bidingo Hub News-na talataniko on·angengon, “Ia project-ko sorkari an·tangan jako ra·e nirok sandina cholko sandichina ba dolko songskachina chinga sorkario dabienga,” ine Meghalaya EMRI Workers Union-ni advisor Susan Lyngdoh parakataha.

2021 bilsini March jaode GVK management-na dongimin somoi bon·gnok ine janapatengon, “Ia bilsionide tender-ko bon·ate gipin a·dokni company-rangna on·jachina aro ian a·doko songdongenggipa manderangni namgnina on·gimin gamsa ong·ani gimin a·doktangonikon cholko sandichina chinga sorkariko didienga,” ine Lyngdoh parakataha.

EMRI-o kam ka·enggiparangni ming 36 dabianirangoniko mingchetkosan chu·sokatchina dabiengoba GVK-ko chalaienggiparang, da·onan chu·sokate on·na man·jaenga ineba union-ni advisor parakataha.

Lyngdoh-ni parakatani gitade, lockdown-ni somoirangoba EMRI-o kam ka·enggiparangni dormaharangko kattiahachim.

“Indita bilsirangna chingni dabianirangko chu·sokate on·jahani giminsa da·alo chinga jinma sorkarini mikkangona re·bae jingjengataniko dakna nangaha. Chinga okumu chake jingjengatanirangko dakani ja·manoba GVK-ko chalaienggiparang, da·onan chingni nangnikanirangko chu·sokate on·jaenga,” ine Meghalaya EMRI Workers Union-ni dilgipa parakataha.

spot_img

More articles

spot_img
-->

Latest article