Shillong, Dec 21: Excise Commissioner-ni gital office building-ko rikna gita Mongolbar salo, Meghalaya a•dokni Chief Minister Conrad K Sangma, a•dokni Excise Minister Kyrmen Shylla aro dingtang dingtang officer-rangni mikkango pangchakaniko Shillong-o songe on•angaha.
Ia office building-na pangchakaniko songe on•angani somoio a•dokni Chief Minister Conrad Sangma, jinmana aganprakangengon, ru•uta somoirangna matchotgija dongenggipa kamko da•o be•en pil•atna man•enga ine an•tangni kusi ong•aniko parakangenba, ia office building-ko rikanichi department-ni kamrangko nambate ka•na man•gnok ine parakataha.
Meghalaya a•dok bilsi 50 gapna sipilengahaoba Excise gita dakgipa department-ni building dongkujaenga ine an•tangni suk ong•gijaniko parakatengon, ia nokko rikmanahaode ian Secretariat jolo damsa nambatsranggipa building-rangoni damsa ong•gnok ine Chief Minister parakataha.
Sajinmani somoirango a•dokna man•dapani dongsrangjahani a•sel neng•nikanirangko chagrongna nanggenchimoba a•dokna kajinako ra•baanio Excise department-ba ge•sa nambate kamko ka•gipa department ong•aha ineba Chief Minister aganaha.
Joltango tarigipa churangna kajinarangko komiatna cholrangko sandie a•doko chu tariani kamrangko namdapatna miksongenga ineba Chief Minister parakataha.
Ia tom•anio a•dokni Excise Minister Kyrmen Shylla-ba jinmana aganprakangengon, ia Excise Commissioner-ni gital building-o a•doko tarigipa aro gipin biaprangoniko ra•baenggipa churangko porikka ra•e nichakna gita Meghalaya Excise department-ni Testing Laboratory-koba dongen ine parakataha.
Ia tom•anio Excise department-ni ‘logo’-koba Chief Minister-ni jakchi oprake on•angjolaha.
