New Delhi, Jan 4: Sombar salo game ge•e cha•gipa dolrang, ma•mong sorkarini dilgiparang baksa snigipa changna tom•e agangrikangahaoba, game ge•e cha•giparangni ra•galpilchina dabienggipa farm law-rangko ma•mong sorkari ra•galpilna man•jawa ine aganahani gimin dolgnini gisepo agangrikani chu•sokgipa ong•na man•taijaha. Apsan daken game ge•e cha•enggipa manderangba, ia niamrangko ra•galpilkuja dipet uamangni jingjengataniko dontongjawa ine sorkarina aganskaaha.
Dolgnini gisepo snigipa changna agangrikani chu•sokna man•taijahani gimin da•o re•baenggipa January 8 tariko dolgni agangrikna tik ka•e donangtaiaha.
Ia tom•anio Union minister Narendra Singh Tomar, sakgipin minister Piyush Goyal aro Som Prakash-ba dongpae bak ra•angaha aro uamang game ge•e cha•enggipa manderangni maiba neng•nikanirang donggenchimode ua niamrangko nipiltaigen ine game ge•e cha•giparangna parakataha.
Ia tom•anio game ge•e cha•gipa dolrangoni sak 41 dilgiparang bakko ra•angskaaha aro uamangni dabiengani gita farm laws-ni niam minggittamko ra•galkuja dipetde uamangni jingjengataniko dontongjawa ine sorkarina parakangskaaha.
“Minggittam farm laws-ko mingprakprak dake nianggen ine sorkari aganenba, ia niamrangko ra•galpiljawa ine chingna aganaha. Indiba chinga ia niamrangko ra•galpile Minimum Support Price (MSP)-na niamko ra•baskachina aganaha,” ine game ge•e cha•giparangni dolko dilenggipa Joginder Singh Ugrahan, kobor ra•timgiparangna parakataha.
Delhi-ni Vigyan Bhavan-o tom•aniko a•bachengna skang, jingjengataniko dakanio sianggipa sak 50 game ge•e cha•giparangna mande ra•pilskaani chin gita dolgnian minute gnina jrip dongaha.
January 26 tarikni gisepo game ge•e cha•enggipa manderangni dabianiko chu•sokate on•jagenchimode a•songni Republic Day-ko maniani somoio an•tangtangni tractor-rangko ra•e New Delhi-o re•jomna gita adita salrangna skangsan Samyukt Kisan Morcha, mikrakataniko on•angahachim.
Farmers’ Produce Trade and Commerce (Promotion and Facilitation) Act, 2020, the Farmers (Empowerment and Protection) Agreement on Price Assurance & Farm Services Act, 2020 aro the Essential Commodities (Amendment) Act 2020-ko ra•galpilchina dabie a•songni dingtang dingtang biaprango game ge•e cha•enggipa hajalni hajal manderang, Delhi-ni rikamo jingjengatanirangko dakengachim ine nikna man•a.
