Resubelpara, July 28: Bilsi 2021 March Jaoni FOCUS programme-ko a·bachengaton da·alona sak lakh 2.45 manderang namgniko man·enganiko nikna man·aha.
A·dokni skotong Minister Conrad K Sangma FOCUS-ni chu·sokaniko kusi ong·an baksa gitalgipa FOCUS+ programme-ko North Garo Hills-ni Resubelpara-o ong·atangaha. Ia Programme-ni ning·o dingtangmancha a·doko songdonggipa game cha·gipa jerangan FOCUS-ni ning·o biming segatgimin nokantina tangka gong hajal 5000 prakko on·a tik ka·angaha.
NITI Aayog-ni segatgimino gita Meghalaya a·dokba ia FOCUS programme-ni gitan tang·doaniko nikna man·engaha.
Skotong Minister Conrad K Sangma tom·anio aganengon, bilsi 4 adha sorkari rikanio chu·sokani aro a·dokni tang·doaniko aganan baksa Lakadong project, wak jillani, matchu jillani aro ugita gipin a·jarango chu·sokanirangko aganaha.
FOCUS programme-ko anga dingtangmancha namnikaha maina iachin anga a·doko songdonggipa game ge·e cha·giparangko tang·doatna aro uamangna nambata cholko on·a man·aha. Da·alo pilak namgnirangko niwilwalen FOCUS+ scheme-ni ning·o game ge·e cha·enggipa a·dokgimikni nokdangpraknan tangka gong 5000-ko bank account gita on·a tik ka·aha ineba Sangma jinmao parakangaha.
