25.7 C
Tura

Ganol Hydel Power Project-ni bidingo Power Minister talata

Must read

Tura, Dec 3: Ganol Hydel Power Project-ni bidingo a•dokni opposition Congress dol, National People’s Party (NPP)-chi dilenggipa MDA sorkariko matnangna jotton ka•engani gimin da•al salni bako a•dokni Power Minister James K Sangma, ia power project-ni bidingo jinmana talataniko on•angaha.

Sangma-ni parakatani gitade, ia Ganol Hydel Power Project-ko Congress sorkarini somoion a•bachengahaoba ia project-ko chu•sokatchipna man•jae da•o ia project-ni koros batangani gimin MDA sorkarikosa matnangna jotton ka•skaengachim.

“Gitcham sorkarini somoion ia Ganol project-ko a•bachengatahachim. Ua somoio ia project-ko a•bachengatna man•chipjae ja•manode ia project-ko 2018 bilsini February jao matchotgen ine aganskaahachim. Indake ong•genchimoba uamang an•tangtangni ku•rachakaniko chu•sokatna man•chipjaha aro da•o NPP sorkarisa, ia project-ko Garo Hills-na aro Garo Hills-ni manderangna chu•sokate on•na miksonge kamko ka•aha,” ine Power Minister parakataha.

Ia project-na chamgipa tangka paisarangko Congress sorkarini somoio jakkalsretahani gimin NPP-chi dilenggipa sorkarini jako ra•ani somoio ia project-ko den•gale manderangni krorni kror tangkarangko indin ong•atna man•aiachim indiba ia sorkari, manderangni namgnina chanchie ia kamko jako ra•e ka•aha ineba Sangma parakataha.

“Chingni sorkari ia project-ko matchotatna gitasa tik ka•aha indiba opposition dolde chong•mot a•selko nikjae an•tangtangni chu•sokatgijagipa kamna sorkarikosa matnangskaenga. Ia project-o a•arangni a•sel dam-ni chua batangaha aro iani a•selsa tangka paisarangko bang•bate nangskaengaha,” ine Power Minister talate on•angaha.
NPP-chi dilenggipa sorkarini somoio ia Ganol project-an Garo Hills-o skanggipa hydropower project ong•enga aro ia project da•o ka•sine chu•sokbaengaha ineba Sangma parakataha.
“Ia Ganol project matchotahaode Meghalaya a•dokni manderang bang•a namgnirangko man•gnok,” ine Sangma parakataha.

Congress sorkarini somoio project-ni biapko geological-ni gita am•sandianirangko dakon, Survey aro Inspection (S & I)-o chu•onggijanirangko mesokahachim ine nikna man•a.
“Uamangni contractor-rang be•srigimin aro olgrokgipa ro•ongrangko jakkalna nangaha aro iani a•selan baditaba chang kamrang dontongatako man•aha. Iani bidingo 2017 bilsini GAC report-on tale parakaha. 2007 bilsio Congress sorkarini somoio tarigipa DPR-koba chu•sokgipa ong•ja ine report-o parakaha aro ia project-ko 2008 bilsion ra•chakahachim. Bilsi 10-mangna kamko ka•ani ja•manoba gitcham sorkari, ia project-ko chu•sokgipa ong•atna man•chipjaha,” ine Power Minister parakataha.

More articles

LEAVE A REPLY

Please enter your comment!
Please enter your name here

Latest article