Shillong, Dec 3: Warachakgipa dolni dingtang dingtang cholko ra·e Power Department-ko matnanganina, “kakketko aganode da·o NPP-ni rikenggipa sorkarini a·selsa 2018 bilsioni a·doko bijoli siani namen komimanchajok. Batanggimin somoio rikgipa sorkarini ning·o bijolini bilsi a·na jol gimik sisimsimaainiko channan man·piljachim aro a·ran kario bijoli siade ong·rongbewal gita daksrangaichim indiba NPP-ni rikenggipa sorkari pilak poraienggipa chatro chatrirangni neng·nikaniko nike man·a dipet bijoliko siatgijan watenga.
Ia bilsio MDA sorkarini ning·o bijoliko siatsranggijan watna chanchisoanirang dongaha aro aditan chu·soknaba man·aha ine nikna man·a. Daiko ma·sigipa sorkari ong·e Department-ni kosako matnanganiko anga Minister ong·e dai ra·na nangnika. Warachakgipa dolni pilak matnanganirang kakket ong·ja uan manderangko dilsretna miksonge politiks kal·anisan ong·aia’ ine Power minister Pa James K Sangma aganchakskaha.
ADB project-ko ra·e warachakgipa dolni ma·sisretanina Power Minister talata
A·doko bijoli on·aniko namdapatna gita Asian Development Bank-niko tangka-paisarangko ra·sroe kamko ka·atna miksongengani bidingo warachakgipa dolni matnanganina, ma·sisretanirang donganiko manderangna talate on·angmanaha ine a·dokni Power minister Pa James K. Sangma talataha.
Pilakni gimin manderangna aganchakna nanggipa ong·a ingipako NPP-chi rikdilenggipa sorkari ma·sienba, iani bidingo manderangni nikao chu·gimik mamingo donmitapani grian dakna nangchongmotaniko nike dakaha ineba ua aganaha.
Asian Development Bank, nangenggipa tangka-paisarangko ma·mong sorkarina ra·srona gita on·aha. Ma·mong sorkarisa ua tangka-paisarangko chotpilani bidingo kang·kare kaenggipaba ong·a, jekon ma·mongonisa ua tangka-paisarangko chamatani gita a·dokna watatskagen. Tangka ra·srogiminko chotpilna dongimin somoi badeoba, iano a·dok sorkaride tangkako chotpilanio bal-bojako chilpretna nanggipa ong·jawaha maina chu·gimik daitokon ma·mong sorkarian ra·manaha ine ua aganaha.
Tender on·anioba uamangni namnikbatgipa dakigipako basena gitasa ong·ataha ine warachakgipa dolni matnanganina, ADB-ni dongimin ja·rikatna nanganirang pilakkon manie ADB project-rangna tender on·ani kamrangko dakataha ine power minister aganchakaha.
Tender on·ani kamo India-ni gipin a·dokrango dakrongenga gitan uko ja·rike dakataha aro kam mingpraknan ADB-ni ra·chakataniko man·esa dakaha. Mamingo cha·bokani grian dakkigiparangko seokna gita online e-tendering portal-ko jakkale tender-na dorkasto on·anirangko dakataha. Iako dakatachi, dam komibate dakigiparangko seoke uamangna contract-ko on·aona sokaha, ineba ua aganaha.
Bijoli on·aniko namdapatna Smart Meter-rangko chatteke on·angna gita, dakkigiparangoni saksa mangmangsan iano chu·sokgipa ong·aiaha. Kakketko aganode, tender-na dorkasto on·anirang gimik ja 6-rangna kingkingan ong·aha aro iana ADB-oniko pilak ra·chakatanirangko man·esa gimikkon dakataha, ineba power minister agandapaha.
Smart Meter-ko jakkalani bidingo Power Minister aganchaka
Smart Meter-ko jakkalani bidingo warachakgipa dolni manderangna ma·sisretatengani bidingo Power Minister Pa James K Sangma ‘gitcham metere-de gamsoe jakkalnasan choliaiachim indiba gitalgipa meter-de gamsoe bijoliko jakkalanio ba bijoliko jakkalani ja·manoba tangka gamanio tikkon mesoka. Department-ni da·o jakkalengipa technology ian a·gilsak gimiko nambatsranggipaoni ge·sa ong·enga jean 2.4 chang nambata aro ISI gadangoni ra·chakgiminba ong·enga. A·doko ian skanggipa changna bijoli jakkalniko niani metre nambatsranggipa ong·enga ineba Pa Sangma aganaha.
NPP-ni rikenggipa sorkarini ning·o pilak songjinma aro songadamrango 100 percent bijoliko man·atna kam ka·aha. Tangka paisa gamanioba 67.35 percent-san ong·aia aro 75 percent meter-mangde gitcham ong·tokaha. Iarangko niroke nambatako on·a sorkari kam ka·enga ineba Pa Sangma agandapa.
