Tura, Jan 4: Garo Hills-o segun bolrangko aro gimaangenggipa ma•manti sam-bolrangko tangatpilna gita OneLife Agricole Pvt Ltd company, Garo Hills Autonomous District Council (GHADC) baksa songgigrike soi ka•grikangaha.
Ia sam bolrangko a•gilsakni gipin a•songrango ge•a gamanio jakkalenggipa gital kolrangchi ge•na aro samtangtango ong•telaigiparangko ripinge rakkianichi A•chik a•songo songdongenggipa manderangna namgniko ra•bana gita OneLife Agricole Pvt Ltd, ja•kuko de•chakataha.
Ia kamna GHADC-ni gita dingtangmancha hectare 15,000 a•arangko on•na miksongenga aro ia kamko ka•na OneLife dol, gipin a•songrangoni u•i-ma•sigipa manderangko Garo Hills-ona rimbaskana tik ka•aha.
Ia project ba kamko ka•na gita OneLife dol, India a•songni manderang baksana Israel, USA aro South Africa a•songrangni scientist aro agronomist-rangko rimbagen ine OneLife company-ni official-rang u•iataha.
Ia project-na OneLife Agricole Pvt Ltd baksa GHADC-ni Chief Executive Member Albinush R Marak aro Executive Committee-ni Secretary S Ricardo R Marak, soi ka•grikangaha.
Ia kamko a•bachengatna gita GHADC baksa songgigrikna man•ahani gimin OneLife dolni co-founder-rang, chong•motan Kumar Rajesh aro Christiaan Bosman sakgnian, kusi ong•aniko parakattokaha.
