Shillong, April 5: Meghalaya a•doko bijolini gita neng•nikanirangko chagrongna nangengani gimin a•dokni Power Minister James K Sangma-ko ra•galchina dabitokengon, re•baenggipa April-ni 12 tariko ong•atenggipa GHADC election-ni ja•man, iani bidingo apsan chanchirimna gita MDA coordination committee-ni tom•aniko ong•atna sienga.
MDA-o bakrimenggipa Nongkrem-ni MLA Lambor Malngiang-ni aganani gitade, James Sangma-ko Power Minister-ni kamoniko ra•galchina gita United Democratic Party (UDP) dolni dabienggipani bidingo MDA-o bakrimenggipa dingtang dingtang dolrang apsan tom•e chanchirimanggen.
“Iani bidingo chanchirimna gita MDA coordination committee-na pakwatmanahani gimin anga an•tangde mamingkoba aganna nangani dongjawa,” ine Malngiang parakataha.
A•dokni Chief Minister Conrad Sangma, Garo Hills-o GHADC election-na wenengkua aro ua Shillong-ona re•bapilahaon iani bidingo MDA-ni dilgiparang apsan chanchirimanggen ineba Nongkrem-ni MLA parakataha.
Malngiang-ni aganani gitade, Power Minister-ko ra•galchina dabienggipani bidingo pilak dilgiparangan an•tangtangni chanchianirang donga aro apsan tom•e chanchirimenba ia neng•nikaniko namatna gita nangenga.
“MDA-ni dilgiparang apsan asongenba Power Minister-ni talatanikoba knae ra•chengna nangenga,” ine Malngiang aganaha.
Da•o dipet a•dokni Chief Minister Conrad Sangma, Garo Hills-o dongkame Garo Hills Autonomous District Council (GHADC) election-na campaign ka•engachim ine nikna man•a.
Indake ong•engon, MeECL-ko chalaianio adita neng•nikanirang donga aro ia neng•nikanirangko namatna gitade MDA coordination committee-ni tom•anio apsan chanchirimna nanggen ine KHNAM dolni MLA Adelbert Nongrum parakatskaaha.
“Ia neng•nikanide ru•uta bilsirangonin dongenga aro ia neng•nikaniko chinga ta•raken bon•atna nangnikenga,” ine Nongrum aganaha.
MDA-o bakrimenggipa membor ong•e ua iani bidingo mamingkon aganna skangba name sandichengna nanggen ineba KHNAM MLA parakataha.
Power Minister-ko ra•galchina gita UDP-ni dabienggipani gimin janapatengon, “Angni nangnikanide Power Minister-ko ra•galanisan ong•ja indiba Meghalaya a•dokni bilsi 50 gapaniko manina skangan ia neng•nikaniko namatanisa ong•enga,” ine Nongrum parakataha.
