Shillong, Oct 7: Meghalaya a•dokni damgittam Assembly constituency-rango bye-election-ko ong•atna siengani gimin pilak dolrangan kamrangko ka•chichasotokengahaon, a•doko aro a•songo opposition (Congress) dolrangni kamrangko nie, National People’s Party (NPP) chena ka•dongengoba gipin dolrangkoba mikchepjaenga ine Bristibar salo NPP-ni national president Conrad K Sangma parakataha.
NPP-ni national president aro Meghalaya a•dokni Chief Minister Conrad K Sangma-ni parakatani gitade, ua an•tangan changbongana kingking election-o susae nigimin ong•e, an•tang baksa susaskagiparangko mikchepon ong•gija ja•kuko de•ani ong•engaha ine ma•sigimin ong•a.
“Anga an•tangan iako bebera•e ja•rikgipa ong•ani gimin opposition-rangko mikchepjachina aro agre ka•dongdugajachina angni candidate-rangkoba aganronga,” ine Sangma aganaha.
Election-o susaenggipa gipin dolrangko mikchepjawa indiba damgittam constituency-rangon chegipa ong•na uamang krenge kamko ka•gen ineba Sangma parakataha.
A•dokni damgittam Assembly constituency-rang, chong•motan Mawphlang, Mawryngkneng aro Rajabala-ni manderang NPP-ni kamrangko nikmanahani gimin ia damgittam constituency-ni manderangan NPP baksa ong•na siktokenga ineba NPP-ni national president parakataha.
Mawryngkneng constituency-o MDA-o bakrimenggipa United Democratic Party (UDP)-ni susagija NPP-na chakpaaniko on•engani gimin sing•on, uamang sorkariko apsan nangrime rikgipa ong•e dolsa dolgipinko mande ra•grika aro chol man•ode pangnan saksa sakgipinko dakchakgrikaigen ine Sangma parakataha.
Badiaba constituency-o uamang NPP-ni candidate-ko susaatjagenchimode apsan daken uamangba UDP-na kam ka•skaaigenchim ineba Sangma parakataha.
“Mawryngkneng constituency-o chakpaaniko on•engani gimin chinga UDP-ko mittelpilna ska,” ine NPP-ni national president aganaha.
