Shillong, May 23: Mawdiangdiang-o rikenggipa gital Assembly building-ni ‘dome’ be•gropani gimin independent inquiry-ko ba jakgitele am•sandiataniko dakchina aro rakgipa ja•kurangko de•china gita Sombar salo, Meghalaya Pradesh Congress Committee (MPCC)-ba dabiangaha.
Iani bidingo MPCC-ni working president PN Syiem aro Deborah Marak, Shillong songjinmani Congress Bhawan-o kobor ra•timgipa manderang baksa agangrikengon, gital Assembly building-ni ‘dome’ be•gropani gimin jakgitele am•sandianiko dakatchina a•dok sorkario dabiangaha.
PN Syiem-ni parakatani gitade, ia Assembly building-ko rikna tender clause-ko on•anio, subcontract-ko on•na gita maming niamrang dongjachim indiba ia building-ko rikna contract-ko man•gipa UPRNN Ltd, ia building-ni ‘dome’-ko rikna gita Assam-oni BRC Ltd company-na subcontract-ko on•skaahachim.
Ia Assembly building-ni ‘dome’ be•gropani gimin independent inquiry-ko dakchina dabiangengon, ia ‘dome’ be•gropanina IIT Rourkee-ko dos galede maming namgni dongjawa maina a•dokni ramram manderangba ma•sienga ia nokko rikanirang namjani a•selsa ia ‘dome’ be•gropaha ine Syiem parakataha.
Iandakgipa kamrangara tangka paisa jakkalsretaniko mesokanisan ong•aigija manderangni jangginaba kenchakna nanganiko ra•baani ong•enga ineba MPCC-ni working president parakataha.
Apsan daken MPCC-ni sakgipin working president Deborah Marak-ba ia gital Assembly building-ni ‘dome’ be•gropani gimin an•tangni suk ong•gijaniko parakataha aro iani bidingo independent inquiry-ko dakatchina a•dok sorkario dabiangaha.
Inquiry report-ko man•kujaskal ia project-ko donkuchina gitaba MPCC dabiangaha.
