Shillong, May 24: Mawdiangdiang-o rikenggipa gital Assembly building-ni ‘dome’ be•gropgipani bidingo tale ma•sie ra•na gita Mongolbar salo, High Powered Committee (HPC), third party audit-ko ka•na manchie donangaha.
HPC-ni tom•anio, Meghalaya a•dokni Chief Minister Conrad K Sangma, Opposition dolni dilgipa Dr Mukul Sangma aro HPC-ni member Ampareen Lyngdoh baksana gipin official-rangba bakko ra•angahachim.
Meghalaya Legislative Assembly-ni Speaker Metbah Lyngdoh-ni kobor ra•timgiparangna parakatani gitade, ia Assembly building-ni right wing, left wing, corridor, reception area, Speaker aro Chief Minister-ni Chamber, ground floor aro basement-ko man•chape ia building-ni gipin bakrango naljokaniko aro bilakbatataniko on•na gitaba audit ka•gipa dolan, kamrangko tik ka•e on•angjolgen.
Ia kamna IIT Guwahati, IIT Kolkata aro IIT Delhi-ni dakchakaniko ra•na gita HPC tik ka•angaha ine janapatengon, ia damgittam IIT-oni damsade audit-ko ka•gen aro iani bidingo ia damgittam IIT-rangna seatchina gita PWD (Buildings)-ko ge•etmanaha ine Lyngdoh parakataha.
Ia audit ka•ani report-ko uamang ta•raken man•na gita nangnikenga aro report-ko man•kujaskal nok rikani kamrangko chu•gimik dontongatchenggen ineba Assembly Speaker parakataha.
