Tura, Feb 24: Greater Baghmara Water Supply Scheme project-na pangchakaniko da•al Budbar salni bako Meghalaya a•dokni Chief Minister Conrad K Sangma, songe on•angaha aro ia water supply scheme-na pangchakaniko songe on•anio a•dokni PHE Minister Renikton Lyngdoh, North Tura-ni MLA Thomas A Sangma, Baghmara-ni MLA Samuel Sangma, Rongara-Siju-ni MLA Rakkam A Sangma aro gipin dilgiparangba dongpae bakko ra•angaha.

Ia Greater Baghmara Water Supply Scheme-na India sorkarini ning•o donggipa DoNER Ministry, NESIDS-ni gita gong kror 47.54-ko aro Meghalaya sorkari-ni gita gong kror 15.96-ko chame gimik gong kror 63.50 tangkarangko chamenga.

Ia Greater Baghmara Water Supply Scheme (GBWSS)-ko a•bachengatahaode Baghmara jillasan ong•aigija South Garo Hills a•jani dam 16 songrang, chong•motan Rewak Kambepal, Rewak, Rongchekgri, Karukol A•dinggre, Karukol Jaligre, Karukol Konagittim, Chigitchakgre, Goka Songmong, Karukol Tainang, Goka Wachol, Masighat, Dabigre, Balkal Watregittim, Rongrengpal, Tainang Songmong aro Badri Jaisrugittim songrangba namgniko man•gnok ine u•iataha.

Ia Water supply scheme-na chiko Rongdong chibisikoniko ra•bana siengani gimin ia scheme-ni ning•o ge 2340 nokdangrangna aro sak 63,335 manderangna chiko sokate on•na miksongenga.

Ia project ba kamna skanggipa bako gong kror 10 tangkarangko ia 2021 bilsini January jaon watatmanaha aro tender-koba apsan jaon okame February jao bikotaha. Kamko on•na gita proposal-ko January jani 13 tarikon sorkarina on•atmanaha aro iana Administrative Approval-ko man•soahaon kamko pakwate on•anggnok. Ia project-ko bilsi gnini gisepon matchotatna gita somoiko donsomanaha.

Ia GBWSS-na pangchakaniko songe on•angani somoio a•dokni Chief Minister jinmana aganprakangengon, ia project-ko a•bachengatanichi Baghmara aro South Garo Hills a•jani dam 16 songrango donggipa manderangna ringani chirangko on•anio bang•a namgni ong•gnok ine parakangaha.

“Ian MDA sorkarini South Garo Hills a•jao songdongenggipa manderangna ku•rachakaniko chu•sokatani ong•enga,” ine Sangma aganaha.

South Garo Hills a•jako ru•utbea bilsirangna galchipe dona gita ong•ahani gimin indita bilsirangna galchipe donako man•ani ja•man a•jao songdongenggipa manderangna namroro silroroaniko ra•bae on•anian MDA sorkarini miksongani ong•engachim ineba Chief Minister aganaha.

“South Garo Hills a•jao buring bolgrimrang aro a•ningni gam-jinrang donge a•dokna man•dapaniko ra•bae on•gipa a•ja ong•genchimoba a•doko galchipako man•batsranggipa a•ja ong•skaachim aro iani giminsa angni South Garo Hills a•jaona re•baa changantian a•jao namroro silroroaniko ra•bana gita anga dingtang dingtang project-rangko ra•gatna nangnikaha,” ine Sangma aganaha.

South Garo Hills a•jako mikkangchi nambate nirokangna ku•rachakaniko on•angengon, “Ia Water Supply Scheme-na pangchakaniko songmangmange on•anichi bon•chipaijawa aro je kamrangkon chinga a•bachengataha, ua kamrangko matchotate on•na anga an•tangan kang•kare kaenga. Chinga ia kamrangko nirokjringanggen,” ine Chief Minister parakataha.

Ia GBWSS-na pangchakaniko songe on•anio a•dokni PHE Minister Renikton Lyngdoh-ba jinmana aganprakangengon, MDA sorkarini membor-rang ong•e uamang Baghmara-ona re•bae ia project-ni bidingo manderangna parakena namen kusi ong•a ine parakangaha.
Chiara mandena namen nangchongmotgipa ong•a ine janapatengon, “Chia janggi ong•a aro chiara an•chingna mandena aro sam bolrangna janggiko on•gipasan ong•aija indiba an•chingni dingtang dingtang kamrangoba an•ching chiko nangchongmota,” ine Lyngdoh aganaha.