Guwahati, Feb 24: Assam a•doko Congress dolni bang•bata dilgiparang gipin dolrango naptokahaoba da•o Assam a•dokni Assembly election-na skang, Chhattisgarh a•doko chief minister Bhupesh Baghel-ni dakbewalko ja•rike Congress dolko bilakatpiltaina gita Congress dolni dilgiparang kamko ka•enga.
2018 bilsio Chhattisgarh a•dokni Assembly election-o da•o ong•enggipa Chief Minister Bhupesh Baghel-ni rakbee kamrangko ka•anichi Raman Singh-chi dilanggipa gitcham sorkariko be•gruatna man•ahani gimin da•o Assam a•dokoba ia apsan ja•kuko de•e Congress dolko bilakatpiltaina gita, Assam a•doko Congress dolni dilgiparangna aro Assam a•dokni constituency ge•antion kam ka•enggiparangna skie on•na gita Baghel-ni manderangko Assam-ona rimbaaha.
Congress doloni koborko on•ani gitade, da•o Assam a•doko Congress dolni dilgiparangna skie on•ani bewalrang namen nambatengaha aro ia skie on•ani program-ko uamang pangnan doltangna kakket ong•na aro India a•songni niamrangko ja•rikna ku•mikchetanirangko dakanichisa a•bachengrongengachim.
Ia ‘Team Baghel’-ni membor-rangko, Chhattisgarh-ni Chief Minister an•tangan basee ra•baaha aro da•o uamangko Assam a•dokni dingtang dingtang biaprango done, Congress dolni dilgiparangna aro Congress dolna kam ka•enggiparangna skie on•anirangko dakenga.
Ia ‘Team Baghel’-o Chief Minister-na ku•pattie on•gipa manderang, cabinet minister-rang, MLA-rang aro a•jarangko nirokenggipa manderangba dongpaenga aro uamangni kamrangko da•o Assam a•dokni election-o Congress dolni star campaigner ong•paenggiparangoni saksa Baghel an•tangan nitimenga.
Congress dolna kamko ka•enggipa mitam manderangni u•iatani gitade, Assam a•doko Congress dolni bang•a dilgiparangan ong•katahani a•sel aro Assam a•doko changgittamna chief minister ong•anggipa Tarun Gogoi-ni siangani a•sel Assam-o Congress dol bilgriatako man•ahaoba da•o Baghel aro uni dolni kamrangko a•bachengatahani gimin Assam-o Congress dol bilakbana gita a•bachengtaiengaha.
Indake ong•genchimoba, Congress dolni iandake tarisamsoaniko BJP dol jegalatskaaha aro Chhattisgarh-oba changsanasan chu•sokgipa ong•aiani gimin Assam-ode Baghel-ni kam chu•sokgipa ong•na man•jawa ine parakatskaaha.
