Tura, Feb 24: Re•baenggipa 2022 bilsio Meghalaya a•dokko man•chengaoni bilsi 50 gapengahani gimin ia bilsi 50 gapaniko maniani bak gita Baghmara-o ong•atenggipa Inter-Club Basketball Tournament-ko da•al Budbar salni bako Meghalaya a•dokni Chief Minister Conrad K Sangma, a•bachengate on•angaha.
Ia Basketball Tournament-ko a•bachengate on•angani somoio a•dokni Chief Minister, jinmana aganprakangengon, gitcham dilgiparang an•tangtangko on•kange kamko ka•angahani a•sel da•alo Meghalaya a•doko songdongenggipa manderang jakgitele janggi tangna man•enga ine pagitchamrangni on•gilaniko pangnan gisik ra•china gita chadamberangko didiangaha.
“An•chingni pagitchamrang an•tangtangko on•kange krengdilahani giminsa an•ching Meghalaya a•dokko man•aha, uni gimin an•ching pangnan uamangni kamko gisik ra•na nanga. Gitcham dilgiparangni kamrangko an•ching chadamberang pangnan gualronga indiba an•ching pangnan uamangni kamrangko gisik ra•e uamangni a•bachengatgipa kamrangko ka•angskana nanga,” ine Chief Minister aganaha.
Ia tom•anio Siju-Rongara-ni MLA Rakkam A Sangma-ba dongpae jinmana aganprakengon, Baghmara jilara Meghalaya a•dokni skanggipa Chief Minister-ni atchiram biap ong•ani gimin a•dokni bilsi 50 gapaniko ia biaponi manichakataniara namen krabeani ong•aha ine parakangaha.
Re•baenggipa 2022 bilsini January 21 tariko Meghalaya a•dokni bilsi 50 gapaniko manianio Baghmara-o dal•begipa cultural aro kal•susaani program-ko ong•atchina gitaba ua sorkariko didiangaha.
Ia tom•anio dongpae jinmana aganprakanggipa gipin manderangara North Tura-ni MLA Thomas A Sangma aro gipinrang ong•a.
