Mon, Naitung 19: Kumba lai ngut ki briew ki la iap bad saw ngut kiwei pat la ba ngeit ba ki ba kin sahkut hadien ka jingtwa khyndew kaba jur bha kaba la mih na u slap ba khlem sangeh kaba la lynshop ia ka Defence Colony ha ka sor Mon jong ka Nagaland ha ka step jong ka Sngi U Blei bad kaba la tap ia 13 tylli ki iing hapoh ki thliew.
U Deputy Commissioner Wennyei Konyak u la iathuh ba la sei ia lai tylli ki met iap, katba ka jingwad bad jingpyllait im ka dang bteng ban lap ia saw ngut kiwei pat kiba la ngeit ba ki sahkut hapoh khyndew.
Ki jingpyrshang ban pyllait im kiba la ïadon bynta da ka State Disaster Response Force (SDRF), ki district police, Assam Rifles, bad ki nongtrei mon sngewbha jong ka thaiñ ki la ïaid shakhmat wat hapdeng ki jingeh.Ki heh ophisar ki la ong ba ki jingbym shngain, ka jinghap slap kaba bteng bad ka um kaba tuid stet ka pynthut ia ki jingtreikam.
Ka bor pyniaid district ka la ong ba la don ruh ka jingtwa khyndew bun tylli ha kiwei pat ki bynta jong ka sor Mon, katba ka jingtwa khyndew kaba jur bha harud wah ka la buh ïa ki katto katne ki ïing kiba don hajan ha ka jingma.
U Myntri Rangbah ka jylla u Neiphiu Rio u la pynpaw ka jingsngewsih halor kane ka jingjia bad pynbna mardor ban ai jingïarap na ka bynta ki bahaïing jong kito kiba la duh noh ïa la ka jong ka jingim, nalor ka jingïarap na ka bynta ki longïing kiba shah ktah.
Ka post ha ka X, u Rio u la ong ba ki bor peit jong ka Nagaland State Disaster Management Authority (NSDMA), district administration, District Disaster Management Authority (DDMA), SDRF, ki pulit, ki shipai Assam Rifles bad ki paidbah nongshong shnong ki ïatreilang ban pynlong ïa ki kam pynlait im bad ai jingïarap.
U president ka NPP Nagaland uba dei ruh u MLA u A. Nyamnyei Konyak u la pynpaw ka jingsngewlem sha kitei ki longïing kiba la duh noh da kaba ïaroh ïa ka jingtrei shitom jong ki nongpyllait im bad ki nongtrei mon sngewbha, bad u la kyrpad ruh ïa ka sorkar jylla ba kan ai jingïarap mardor ïa kito kiba la shah ktah.
Da ka jingïathuh lypa jong ka tnat India Meteorological Department (IMD) ba kan dang jur shuh shuh u slap ha kine ki sngi ban wan, ki bor pynïaid ki la kyntu ïa ki nongshong shnong ba kin kiar na ki jaka ba lah ban twa khyndew bad ki rud wah. Ka jingpeit bniah ia ki jingjulor bad ka kam pynbha kan sdang ynda ki jinglong jingman ki la long kiba shngain.
Pule ruh : Hukum ka High Court ban aiti shawei ia ka jingtohkit, kurup CCTV ba iap ka Khynnah ha Nongpoh
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
