Shillong, Naitung 17 : Ka Meghalaya High Court ha ka sngi Palei kala hukum ban aiti noh shawei ia ka jingtohkit bad ban kurup ia ki video CCTV haba iadei bad ka jingkynnoh dkhat jubor ka khynnah kynthei iala ka jingim hadien ka jingshah tohkit hapoh ka Women Police Station, Nongpoh.
Haba shong bishar ia ka mukotduma bala mudui da u Anius Majhong, ka Chief Justice Revati Mohite Dere kala bthah ia u Superintendent of Police (SP) ka Ri-Bhoi District ba un “kurup noh mardor ia ki video jong ki CCTV camera kiba don hapoh bad shabar ka Police Station jong ka 22 tarik Jylliew, 2026 naduh ka por12 baje mynsngi haduh 11 baje mynmiet”.
Ia kine ki video dei ban kurup hapoh ka panchnama bad ban thep ia ki hapoh ka jaka ba shngain.
Ia kane ka mukotduma la register hadien ba u Kni jong kane ka khynnah ula kynnoh ba ki Pulit ka Women Police Station kila pynkhein ia ka hok longbriew jong kane ka khynnah ha ka por ba ki pynlong ia ka jingtohkit.
Haba kdew ba ki juh ki Heh Pulit jong ka Police Station ki tohkit ia ka ejahar, u Amicus Curiae S Sen ula pynpaw ba “ki Ophisar kiba don hapoh ka jingbishar bad ba shah kynnoh donbynta ha ka jingdkhat jingim kane ka khynnah, ki dei hi na kajuh ka police station”.
Haba pdiang ia kane ka jingpynsngew, ka Iingkashari kala bthah ia u SP ban “aiti noh ia ka jingtohkit sha ki police station ba marjan bad ban bynshet ia ka jingtohkit ha ki Heh Pulit bala rangbah”.
La bthah ruh ia u SP ba un “khmih bniah hi shimet ia ka jingtohkit” bad ban iai don ha IIngkashari ha ka sien shong bishar ban wan.
Ka Iingkashari kala hukum ba ki Ophisar jong ka Women Police Station ha Nongpoh, kiba shah kynnoh, kim dei satia ban iadonbynta bad ka jingtohkit halor kane ka jingjia bad kim dei ruh ban leit iakynduh ne iakren ia ki bahaiing jong ka lanot la ka long ha kano kano ka rukom ruh”.
U DCPO, Nongpoh uba la wan mih hi dalade, la bthah ba un file ia ka affidavit ban pyntip la kala don ne em ka jingpyntip sha u halor ka jingwanrah ia ka khynnah sha ka Police Station.
Ka Sorkar Jylla, bala mihkhmat da u AAG K Khan, kala aiti ia ka kaiphod na ka DSP, Women Police Station, Nongpoh, ka ban sa file ha ka dur jong ka affidavit.
Ia kane ka mukotduma yn sa shong bishar biang ha ka 29 tarik Naitung, 2026.
