Shillong, July 25: Robibar salo Union Home Minister Amit Shah, Meghalaya a·dokni Chief Minister Conrad K Sangma baksa ‘Greater Sohra Water Supply Scheme’-ko East Khasi Hills a·jani Sohra-o a·bachengate on·angaha aro ia water supply scheme-ko a·bachengatani somoio DoNER Minister G Kishan Reddy, DoNER-ni Minister of State BL Verma, Science & Technology-ni MoS Jitendra Singh, a·dokni PHE Minister Renikton Lyngdoh aro gipin dilgiparangba dongpae bak ra·angaha.
Ia Greater Sohra Water Supply Scheme-ko Meghalaya sorkari a·bachengatahachim aro ia scheme-na DoNER Ministry, NESIDS-ni ning·o gong kror 24.08 tangkarangko 2019 bilsio chamatahachim.
Ia scheme-ni ning·o komibeoba sak 22,293 manderangna ringani chirangko on·na man·na gita ia scheme-ko a·bachengataha.
Ia Greater Sohra Water Supply Scheme-ko a·bachengate on·angani somoio Union Home Minister, jinmana aganprakangengon, Prime Minister-ni ra·gatgipa Jal Jeevan Mission-ni ning·o Sohra jolo songdongenggipa nokdang ge·antinan ringani chirangko on·na gita ia gong kror 25 ong·gipa Greater Sohra Water Supply Scheme-ko DoNER Ministry aro Meghalaya sorkari, North-East Special Infrastructure Scheme (NESIDS)-ni ning·o a·bachengataha ine parakangaha.
Chi rongtaljagenchimode manderangba an·seng baljokgipa ong·jawa ine janapatengon, Meghalaya a·doko songdongenggipa nokdang ge·antinan rongtalgipa ringani chirangko da·o India a·songni jakgitelaoni bilsi 75 gapani aro Meghalaya a·dokni bilsi 50 gapaniko manina skangan sokate on·china gita a·songni Prime Minister Modi nisanko donataha ine Shah parakataha.
Meghalaya a·doko 2,80,000 nokdangrangna ringani chirangko on·na gita dingtangmanchagipa program donga aro ia program-ko ming 1874 chonchongipa project-rango chapataha.
