Urmi Bhattacharjee

Guwahati, May 6: Assam a∙dokni sak 126 membor-rang donggipa Assembly-o Bharatiya Janata Party ge 82 seat-rang aro NDA ge-seatrangna bate man∙e election-ko namen amchepaha aro uandaken a∙dokni skotong minister Himanta Biswa Sarma pil∙taie sason-ona re∙bapilaha. Sorkarini iandake cheanichi a∙dokna dangdike on∙na uamang bang∙bata somoirangko man∙dapaha, aro songdonggipa manderang uamangoniko bang∙a namdapanirangko ra∙bana ka∙dongsoenga.

Skanggipa chango uamang a∙dokna bang∙a silroro-namroroanirangko ra∙baaha. Dingtang dingtang project-rangko ra∙bae kam ka∙enba uamang sorkariko rikaha aro Upper Assam-o Dhola-Sadiya dolong aro Bogibeel dolongko rikanichi re∙a-doani cholrangko namdapataha.

North-Guwahati-Guwahati dolongko rikanichi sorokrango garirangni chakpilgija ong∙aniko komiatgen aro Brahmaputra gita re∙a-doani somoiko komiatgen ine ka∙dongsoenga. Dingtang dingtang a∙jarango sorokrangko dal∙dapatanichi aro National Waterway 2-ni gita chi ramarangko tarianichiba bosturangko ra∙ruraani aro re∙a-doanirangko namdapataha.

A∙doko tourism-ko namdapatnaba sorkari bang∙a ja∙kurangko de∙aha.  Kaziranga National Park aro Manas National Park baksa chongipa jahasrango gadoe roramani aro a∙dokni dingtang dingtang jatrangni janggi tangani bewalrangko mesokani cholrangko namdapataha aro homestay-rang aro dingtang dingtang janggi tangani cholrangko dakchinaba manderangko didiangaha.

Covid-19 sabisini somoi badeani ja∙mano, a∙dokona bang∙a tourist-rang re∙baaha aro da∙onaba Assam-an India-ni Salgro Salaram-ona napbaani cholguga ong∙engkua. Uandake, mikkangchi chu∙sokanirangara ia pilak silroro-namroroanina ja∙ku de∙anirangchi songdonggipa manderangna pangkamgipa janggi tangani cholrangko on∙na man∙anio pangchaka.

A∙doko sanna-banani cholrangba bang∙bataha ine nikna man∙gen. Batanggimin salrango Assam-o dam-dok medical collegerang dongaoni da∙ode dam-chi∙gnina baten chalaienga aro mitamrangko rikenga. Lakhimpur, Dhubri, aro Nagaon a∙jarangoba gital sanchakram biaprangko rikaha.

Ayushman Bharat aro Atal Amrit Abhiyan scheme-rangko ra∙baanichi insurance-ko man∙ani cholrangba bataha, indiba badiaba jolrangko iako chu∙gimik namedake ra∙gatna man∙kujaenga.

Skia-poraba bang∙a namdapanirangko nikna man∙gen. Dingtang dingtang a∙jarango model college-rang, polytechnic-rang aro skill centre-rangko a∙bachengataha. Me∙chik bi∙sarangni poraia dontonganirangko komiatna ine Nijut Moine scheme-ko a∙bachengate uamangna tangka-paisachi dakchakanirangko on∙enga.

Skia-poraianiko dake chu∙sokani aro janggi tangani cholrangko man∙anio neng∙nikanirangko mongsongbate songrango donggipa manderang chagrongkuenga.

A∙doko Orunodoi scheme-ni namgnirangko lak 25 manderang man∙enga, uandake kangal-cholgrigipa nokdangrang, mongsongbate me∙chikrangna jaanti tangka-paisarangko sualatenga. Uandake Swanirbhar Naari, self-help group-rangna aro songo-noko janggi tangani cholrangko dake cha∙na dakchake on∙skaenga. Ia pilak cholrangko ra∙baanichi dingtang dingtang a∙jarango janggi tangani gadangko nambatatna dakchakenga.

Iarangna agreba, pekgipa bosturangko jakkalanirangko dontongatna aro a∙arangko ra∙sekanirangko champengna a∙dok sorkari rakgipa ja∙kurangko de∙aha. Sorkari gisik nange krengaha aro opposition-dol krimkro ong∙e chadengna man∙jaha.

Janggi tangani cholrangko man∙e on∙anian mingsa neng∙nikbegipa kam ong∙engkua. Recruitment drive-rangko ong∙atanichi hajalni hajal sorkarini chakrirangko manderang man∙angaha. Private company-rango bang∙a manderangna janggi tangani cholrangko on∙na man∙jaenga. Bang∙a chadamberangan pangkamgipa janggi tangani cholrang Guwahati-ni a∙paloniko sandikuenga.

Niam gri songdonggiparang aro napsrukbagiparangni bidingo obostarangko namatna man∙kujaenga. National Register of Citizens-o lak 19 manderangko changalangaha aro da∙o uarangko nipiltaianirangko dakengkua.

Citizenship Amendment Act-ko parakataha, aro uko ra∙gatna kamrangko ka∙enga.

Chi bananichi bilsiantin a∙dokni bang∙a biaprango neng∙nikanirangko on∙enga. Iako namatna dingtang dingtang ja∙kurangko de∙enga indiba ge∙a-gamanirang, nok-jamrang, rama-jal∙angrang aro dingtang dingtang rikanirangni nosto ong∙aniko bang∙a a∙jarangon nikna man∙enga.

Manderang an∙tangtangna dilgiparangko baseaha aro uamang banga ka∙donganirangchi nichaksoenga. Uamang sorkarini kam ka∙anirangkode nikangaha indiba da∙o uamang pangkamgipa gadango kamrangko chu∙sokatani aro namdapatanirangko nangnikenga.

Ia chango sorkarini kam ka∙anirang baditana kingking baia da∙o manderang nianggen.

Na·simang iakoba nina man·gen:

Na·simang iakoba poraina man·gen: A·dok sorkari, skigiparang baksa tom·aniko dakanga

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub