Shillong, March 1: Champengatako man•gipa Hynniewtrep National Liberation Council bobil dolrang baksa agangrikna mande donatna sigipani bidingo Ministry of Home Affairs-oni aganchakaniko man•kujaenga ine Home Minister Lakhmen Rymbui Mongolbal salo aganaha. “Uamang baksa agangriknagipa mandeko donatani aro rakkiani gimin chinga MHA ona bimingko watataha, indiba uamangni aganchakaniko sengkuenga” ine kobor ra•timgiparangna Rymbui aganaha. Assam aro Meghalayani sima-arini bidingo MHA baksa golpogrikani somaio skotong minister Conrad K Sangma an•tangba agangrikna sienga ineba Rymbui u•iataha.
Ia bobil dolrang baksa agangrikanio mandeko rakkiani bidingo aro rakkina sigipa mandeni bimingko da•o dipet jinmana parakatkujaenga aro ian ma•mong sorkarini jakosa ong•ani gimin somai sokahaon uni bimingko parakataigen ineba minister agandapaha. HNLC baksa silai mittugrikaniko dakgenma ine sing•on, iani gimin name dake chanchigen aro iani gimin agangriknagipa mandeko rakkiani ja•mansa iani gimin chanchigrikgen ine minister aganaha.
Bading-chiwalgipa manderangna tangka dabiani lekkako HNLC rang on•a inani gimin sing•on, “iarangni giminde maming u•iatanirang dongkuja aro a•dokni polis rang iani gimin kam ka•enga. Uamang baksa sorkari agangrika chu•soka ong•ode uamang ia ong•gija kamrangko dontongna nanggen” ineba Rymbui talatangaha.
