Shillong, March 1: SSA skul skigiparang jabongana kingking dormaha man•jaengon bang•a neng•nikanirangko chagrongtokenga. Uamangni man•a nanggnigipa bangki dormaharangko March 31 ni gisepon on•angna ka•dongani kattarangko mongolbal salo Education Minister Lakhmen Rymbui parakataha.
Meghalaya SSA School Association (MSSSASA) dol uamangni jabongani dormahako on•jaode jinma re•jomae jingjengatanggen ine ka•mikkenatani salsagipaon Education Minister ia kattarangko parakataha. “SSA ni bidingo agangenchimode ian namen rakbegipa aro engtogijani gita ong•a. Skigiparang an•tangtangni man•gnina aro tangka tangtangnamangba ramarangona ong•kate chrik-a•bokna nangenga, uamangna anga namen ka•sachakchongmota” in⋅e minister aganaha. Indiomangba chinga jedakeba ma•mong sorkarioniko chamgimin tangkarangko man•a rakbeen kam ka•enga ineba ua aganangaha.
“Chinga namen kusi ong•bea maina Indiani adita staterangni gisepo an•ching Meghalayaba skanggipa installmentko man•paaha aro nangchongmotgipa UCrangkoba on•atna man•aha aro re•anggipa antio ia gnigipa installment ba dormaharangko seng•gnang watchina Delhiona re•ange golpoaha” in⋅e Rymbui agananha.
Skigipa dolrangni jingjengatna ka•mikkenatani gimin aganengon, March 31 na skangde chinga ia dormaharangni gimin maiba namatani kamkode ka•telgnok aro March 4 aro 17 tarikrango budget seasiono iarangko namatani bidingo chanchigrikanggen” ine Education Minister aganaha. “Sorkari 2019 bilsio kror 78 na baten tangkarangko SSA skigiparangna corpus fund-oniko on•aha. Unigimin ia budget sessiono iarangni gimin chanchigrike March 31 tarikna skangan namatna jotton ka•engaha” ine Education Minister ka•dongani kattarangko aganaha.
