Shillong, Sep 9: Re•anggipa 2021 bilsini August 13 tariko, Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so•otgalani bidingo inquiry dakani report-ko Sukrobar salo, Assembly-ni Autumn Session-ko a•bachengatanio parakataha.
Ia inquiry-ko Justice T Vaiphei-ni inquiry commission dakahachim aro uni tarigimin report-ko Sukrobar salo Assembly-o parakataha.
Inquiry commission-ni report-o parakani gitade, HNLC bobil dolni gitcham general secretary-ko police-rangni pringwal 3:00 bajio rim•na re•anganiara chanchininggija kam ka•aniko mesokani ong•aha aro police-rang bilko nangana bate jakkaljagenchimode uko sianiona sokatjawachim.
“Angni nikani gitade, andalmiting somoio maming chel•chaksoani gri police-rangni ja•ku de•aniara chanchininggija ja•ku de•ani gitasa ong•aha aro ia mandeko siaona sokatgijan ia kamko ka•na man•achim,” ine Justice Vaiphei-ni inquiry report-o parakaha.
Ia report-o parakani gitade, andalmiting somoio aro nangana bate bilko jakkale kamko ka•aniara Thangkhiew-ko tange rim•na police-rangni miksonganikon pe•aniba ong•ahachim.
Ua somoi police-rang, konta gnimang sengkue sal nabana on•chengenba, sianggipa mande aro uni nokdangni kuturirangchi teargas grenade-ko goatgenchim ong•ode, nokni manderang ong•katchina draatako man•gnokchim aro ua somoio sianggipa mandeko altuae rim•na man•genchim aro ia nokni gipin manderangnaba naljokaniko on•na man•genchim ineba Inquiry report-o parakaha.
Sianggipa mandeni nokko chadrapeanio Thangkhiew-na agre nokni darangba maming saknaanirangko man•jaha ine police-rangni pa•sikaniara ra•chakna man•gijani ong•a ineba Justice Vaiphei-ni inquiry report-o parakaha.
“Uni gimin 13-8-2021 tarikni pring 3 bajio sianggipa mandeko rim•na police-rangni uni nokko chadrapeaniara chanchininggija aro nangana bate bil jakkalaniko mesokani ong•aha aro iani a•selsa Cheristerfield Thangkhiew sina gita nangaha,” ine inquiry report parakaha.
Police dolrangni kamko ka•anio naljokaniko on•na gitaba Inquiry commission, dingtangmancha ku•pattianirangko report-o on•angjolaha aro uarangara
(a) Chadrapako man•enggipa nokni dosgri manderang maming saknaanirangko man•jana gita dos dakgipa manderangko walni somoirango chadrapjachina.
b) Walni somoirango operation ba chadrapanirangko dakenggipa sipairangna Night Vision Device (NVD)-rangko on•china.
c) Songjinmarango donggipa nokrangko chadrapanio, sipai dolrang teargas grenade-rangko jakkalchina.
d) Manderangni dongchakenggipa nokrangko chadrapanio dosgri manderangna saknaanirangko aro manderangni gam-jinrangko nisijachina.
e) Mandena on•gimin bilrangko mande ra•na gita police-rangna agan-skie on•china.
f) Songjinmarango donggipa nokrangko chadrapanio, janggi gimaaniko champengna man•na gita police dolrangna ambulance-rangko on•chapchina ku•pattiataha.
