28.8 C
Tura
spot_img

ILP-ni bidingo agangrikna gita M’laya Governor ia antion Delhi-ona re·anggen

Must read

Shillong, Dec 18: Meghalaya a·doko ra·gatchina dabienggipa Inner Line Permit (ILP) aro dingtang dingtang kamrangni bidingo ma·mong sorkari baksa agangrikna gita Meghalaya a·dokni Governor Satya Pal Malik, ia antini gisepon New Delhi-ona re·anggen aro ua New Delhi-o adita salrangnade dongbagen.

Meghalaya a·dokni Governor, a·songni skotong songjinmaona re·angna siengani gimin a·dokni Health Minister AL Hek, BJP dolni sakgipin MLA Sanbor Shullai baksa uko Raj Bhavan-o grongeaha aro a·doko nangenggipa dingtang dingtang kamrangni bidingo ma·mong sorkari baksa agangrikchina uko didiangaha.

Dingtang dingtang dolrangni dabienggipa ILP baksana a·doko bobil dake chakatenggipa Hynniewtrep National Liberation Council (HNLC) dol baksa agangrikani bidingo, joltangoni skia man·gipa manderangko North Eastern Hill University (NEHU)-ni vice chancellor songani bidingo aro Khasi ku·sikko Constitution-ni Eighth Schedule-o ra·gatani bidingoba ma·mong sorkari baksa agangrikchina gita MLA-rang, a·dokni Governor-ko didiangaha.

Meghalaya Residents Safety & Security Amendment Act 2020-ko ra·chakchina gitaba BJP dolni MLA-rang, a·dokni Governor-ko didiangjolaha.

“A·dokni Governor bakan Delhi-ona re·ange adita salrangna dongbana siengani gimin chinga uko gronge a·dokni dingtang dingtang nanganirangni gimin unbaksa agangrikbaaha. Iarangni bidingo ua an·tangni Delhi-o dongbamiting somoio ma·mong sorkari baksa agangrikna ku·rachakaha,” ine a·dokni Health Minister AL Hek parakataha.

Hek-ni aganani gitade, HNLC bobil dolba ru·uta somoirangonin tom·tomaona re·bapilna skaniko parakengahani gimin ia bobil dol baksa ta·raken agangrikna man·na gita uamang Union Home Minister baksa agangrikchina a·dokni Governor-ko mol·molataha.

“HNLC bobil dolkoba chinga so·sojengjeng ong·atani kamrangko watgalchina mol·molatenga. Uamang baksa agangrikna chinga niamko donenga ong·ja indiba so·sojengjeng ong·atani kamrangko watgalchinasa chinga uamangko mol·molenga,” ine Health Minister parakataha.

spot_img

More articles

spot_img
-->

Latest article