New Delhi, May 1: India a·songo ian skanggipa chang ong·e Sonibar salo, konta 24-rangni gisepon sak lak 4 mangni gita COVID-19 sajinmako rim·a man·ani koborrangko parakataha.
Ma·mongni Health Ministry-o segatanggimin gitade, konta 24-rangni gisepon gimik-gimang sak lak 4,01,993 manderango COVID-19 sabisiko rim·a man·aniko segatangaha, jean sabisini a·bachengbaoni salsani gisepo ian bang·batgipa ong·enga.
Iarangna areba, sajinmani a·sel konta 24 -rangni gisepon sak hajal 3,523 mang janggi galaha, jechin a·songo sia gimikara sak lak 2,11,853 mang gapangaha.
A·songo da·o, sak lak 32,68,710 mang manderang sabisiko man·e sana-bananiko ra·tokenga, jenan Maharashtra, Uttar Pradesh, Delhi aro Kerala a·dokrangoniko ia namjabegipa sajinmako bang·bate rim·a man·aniko parakataha.
Apsandake, konta 24-rangni gisepon, India a·song gimiko sak lak 2,99,988 mangni gita ia sabisioni nampiltokani koborrangkoba man·soaha, jechin saoni nampilgiparang da·o sak 1,56,84,406 mang gapaha ine talataha.
Indian Council of Medical Research (ICMR)ni talatani gitade, India gimikoniko mija April 30 tarikona gimik-gimang sak kror 28,83,37,385 mang manderangko COVID-19 sajinmana porikka ka·angaha, jeoni sak lak 19,45,299 mangko mija Sukrobar salo sabisina porikka ka·angtokaha.
Indake ong·engon, COVID-19 sajinmana tikarangko su·ani a·song gimiko sak kror 15,49,89,635 mangna batangaha, ine Health Ministry u·iataha.
