Tura, Feb 7: Meghalaya a·dokni sima ario songdongenggipa manderangna nambata sanna bannaniko on·a miksonganio ge 10 palang gnanggipa Integrated AYUSH Hospital-na pangchakaniko a·dokni Skotong Minister Conrad K Sangma, South West Garo Hills a·jani Merengipara-o songe on·angaha.
Ia tomanio Mahendraganj Constituency-ni MLA Sanjay A. Sangma, Salmanpara-ni MLA Ian Bontham M Sangma aro gipin official-rang dongpae bak ra·angaha.
Ia hospital-ko National AYUSH Mission-ni ning·o rikenga aro ian kror 7-ni project ong·a. Ia hospital-o AYUSH doctor, nurse aro yoga instructor-rangko chanchape, ge 35 post-na kamrangko nakatatgen.
Ian a·jao dal·bea chu·sokani ine janapatengon, a·jani ning·tugipa songrango aro sima arijolo songdongenggipa manderangna nambata sanna bannaniko on·a ja·ku de·ani ong·a. Da·alo outpatient service ba saa ding·aniko porikka ka·e niani mang·mangsan dongachim indiba mikkangchi ia hospital-o donkame sanna bannaniko on·a man·gnok ine Skotong Minister aganaha.
Iano, jatni dakbewalo jakkalrongbaenggipa samrangko jakkalenba je saanikoba sanna banna man·gen aro chadamberangna an·sengbaljokaniko on·anio ia hospital mongsonggipa bakko ra·e dangdike on·anggen ineba ua aganaha.
A·jao namroro silroroatani ja·kurangko janapatskaengon, sima ario songdongenggipa manderangni re·a doanio neng·nikaniko man·ronggipa rama sorokrangba a·dok aro ma·mong sorkarini ning·o on·enggipa scheme-rangchi namdapna man·aha ine aganaha.
Unbakana, sima arini gate-rangko chipani a·sel attamni somoio re·ruraanio neng·nikaniko man·engani gimin re·ruraanio nengrabatatna gita bypass ramana proposal-ko on·aha aro somoi sokon biapko survey ka·anggen ineba Sangma agandapaha.
Lekka pora skianiko on·ani bidingo aganengon, ua jolo gitalgipa Science and Commerce College-ko chalaina a·bachengaha aro ian lekka pora skianiko on·chakram nokdringrangko namdapataniko sorkarini skang done kam ka·enganiko mesoka.
Bangladesh baksa ong·enggipa obostarangko niatpilengon, sima ario songdongenggipa manderangko mikrake dongchina aro authority-rang baksa bakrime tom·tomaniko aro naljokaniko rakkichina Skotong Minister mol·molataha.
Iarangna agreba, badingchiwalani bidingo janapengon, Awang Chips aro Nokma Icecream gita, an·tangtangni changa sapaniko jakkale janggi tangani cholrangko ra·na man·a ineba ua janapataha.
Deputy Commissioner Anendya Raajsshre-ba ia project-ni bidingo janapengon, AYUSH-ni ning·o ia hospital-o, a·jao donggipa manderangna kraa gita aro pilakni gita sanna bannaniko on·a ka·dongsoenga ine aganaha.
SDMHO Dr. Lydia Marak-ba, a·jao man·rongenggipa sabisirangoniko sanna bannanikosa on·aigija an·seng baljokani gimin u·iatanikoba ia hospital on·gen ine aganaha.
Na·simang iakoba nina man·gen:
Na·simang iakoba poraina man·gen: Sianggipa Dilseng Sangma-ni nokdangna tangka lak gittam-ko Ex Gratia dake on•anga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
