Jowai, Nov 25: Adita salrangna skang, Mukroh songo Assam police aro forest guard-rangni skatang goanio dosgri sakbonga manderang so•otako man•na nangahani gimin Sukrobar attamo Jaintia Hills-ni dingtang dingtang NGO-rang, mombati so•e jinma tom•bimonganiko Laad Kiang Nangbah Government College-o ong•atangaha.
Ia tom•bimonganiko ong•atgipa dolrangara, JSU, KSU, FKJGP, HNYF, SKWHRC aro gipin dolrang ong•achim.
Jinma bi•rimaniko dakna skang tom•aniko ong•atanio dingtang dingtang dolni dilgiparang aganprakengon, iandake Assam police aro forest guard-rangni skatang dosgri manderangko so•ote galahani gimin suk ong•gijaniko parakatenba, dosgri manderangko so•otanio jak donggipa pilak manderangkon ta•rake rim•china dabiangtokaha.
Ia a•selko champengna man•jahani gimin Meghalaya aro Assam sorkariko matnangatengon, so•ota man•gipa manderangna kakket bichalko man•kujaskal uamang jingjengataniko dongtongjawa ine NGO-rang parakataha.
