Shillong, Naitung 28 : Ka Special Intensive Revision (SIR), 2026 ha Jylla kan sa kut noh ha ka jingleit rung na kawei ka iing sha kawei pat ha ka 29 tarik Naitung, bad ka jingsam ia ki enumeration form kala jan kot pura bad ym shym la don satia kano kano ka jingujor haduh mynta, ong u Chief Electoral Officer Dr BDR Tiwari ha ka sngi Ba-ar.
Haba kren sha ki lad pathai khubor, u Dr Tiwari ula ong ba ka jingsam ia ki form kala kot haduh 99.62% bad ka jingpynrung ha ki kor digital kala kot haduh 96.95% kat haduh ka 28 tarik Naitung.
Na ki 23,49,645 ngut ki nongthep vote, haduh 23,40,764 tylli ki form lah dep ban sam bad 22,78,071 tylli ki form la pynrung ha ki kor digital.
“Satang shisngi kaba sah, la bthah ia ki BLO ba kin leit pyndep ia ka jingleit rung sha ki iing ba dang sah bad ban pyndep ia ka jingpynrung kor digital hapoh ka por ba buh. Haduh mynta, ngim pat ioh pdiang satia ia kano kano ka jingujor bad kano kano ka jingeh kaba mih, ngi la dep ban pynbeit ia ki” ong u Dr Tiwari.
Ula pynpaw ba ki jingialang bishar kam bad ki video conference ba shisien shitaiew bad ki DEO, ERO bad AERO kala iarap ban weng ia ki jingeh jong ki nongtrei kiba don sha ki lyngkha trei kam bad buh ia ka kam ha ka lynti kaba dei kat kum ka jingbthah jong ka Election Commission of India.
U CEO u pyntip ruh ba ka ECI kala mynjur ban pynbeit ryntih ia ki Polling Station ha Meghalaya bad kane ka sienjan kan wanrah sa 86 tylli ki polling station ba thymmai, kaban kyntiew ia ka jingdon jong ki ha Jylla naka 3,551 sha ka 3,637.
