NARA, Japan, July 8: Japan a•songo ru•utbate Prime Minister ong•anggipa Shinzo Abe-ko Sukrobar salo, parliamentary election-na campaign ka•engmiting somoio mande saksa, janggilchini goe so•otaha.
Bilsi 67 ong•gipa Shinzo Abe-ko Nara songjinmani biap damsao, jinmana aganprakengmiting somoio janggilchini goaha aro uko goa bakan hospital-ona rimange doctor-rang uni janggiko jokatna jotton ka•ahachim indiba ua goako man•aoni konta bonga atamangni ja•man siangna gita nangaha.
Doctor-rangni kobor ra•timgiparangna parakatani gitade, goako man•enba ua damgni dake mata bu•ako man•aha aro an•chirang tipna man•jae ua siangna gita nangaha.
Ia a•sel ong•ani ja•mano Japan a•songo songdongenggipa manderang aro dingtang dingtang dilgiparang namen aiao inmananiko parakattokaha aro ia a•selko Japan-ni Prime Minister Fumio Kishida-ba raken jegalataha.
Indake ong•engon, Japan a•songni gitcham Prime Minister-ko goanina Police-rang, bilsi 41 ong•gipa Tetsuya Yamagami-ko rim•aha ine kobor on•aha.
