Shillong, Aug 19: Sorkari aro manderangni gisepo sepangbate kamrangko ka•na man•na gita Bristibar salo, Jirang-ni NPP MLA Sosthones Sohtun aro MDC Charles Marngar, songni nokni dilgiparang baksa Meghalaya a•dokni Chief Minister Conrad K Sangma-ko gronge Jirang-ko civil sub-division songchina didiangtaiaha. Ian gnigipa changna uamangni Chief Minister-ko gronge sub-division-ko songani bidingo agangrikani ong•enga.
Sohtun-ni parakatani gitade, Jirang constituency-o rama jal•langrang dongjan baksana mamingni gitan namroro silroroanirang dongjaengani gimin dingtang sub-division-ko songna nangengachim.
MDA sorkariko rikchengaonisa Jirang constituency-o college ge•sako man•paaha aro ia college-ko mikkang bilsio kulignok ineba Sohtun parakataha.
Jirang-ko sub-division songani bidingo maming ku•rachakanirangde dongkujaenga indiba sorkari, niam gita kamrangko ka•engani gimin dingtang sub-division-ko man•na ka•donganirang dongenga ineba Jirang MLA parakataha.
Sohtun-ni aganani gitade, Jirang-ni 80 percent simarangan Assam baksa nangchapgipasa ong•genchimoba uamang rasong gnang maming kenani gri janggi tangtokpana man•enga.
“Badiaba biaprangosan meligrikgijanirang dongaia indiba ia meligrikgijanirangko sorkari ta•raken namatgen ine anga ka•dongenga,” ine Sohtun aganaha.
