Shillong, Feb 10: India-ni Election Commission-ni donata gita, Meghalaya-o gital bikotgipa political dol Ka KAM, re·baenggipa 27 tariko ong·nasienggipa Meghalaya Assembly election-o susaangna gita Sukrobar salo, “Bilcham”-ko dolni symbol ba chin dake parakataha.

Khasi Hills a·jao bikotgipa dol Ka KAM, ia jani 27 tariko a·jani damgittam constituency-rango susaaangna miksongenga, jeon Ma Angela Rangad, South Shillong constituency-o da·o BJP dolni MLA ong·enggipa aro Cabinet minister Pa Sanbor Shullai baksa susagrikgen. Uandake, Wanpynhun Kharsyntiew, East Shillong-oni NPP-ni candidate Ma Ampareen Lyngdoh baksa susaanggen aro Kyrsoibor Pyrtuh, North Shillong-o susaangskagen.