SHILLONG, MAY 4 : Justice BP Katakey-ni Committee, uamangni Meghalaya High Court-na on·gipa chang 37-gipa Interim Report-o tangka gong kror 465-ko name jakkalna man·a gita Meghalaya a·dok sorkariko dingtangmancha High Level Monitoring Committee-ko songe on·china u·iataha. Ia tangkarangara niamgri koela bikotani a·sel nosto ong·atako man·gipa samtangtango donggipa biaprangko taripilna miksonganio on·gipa ong·a. Ia bikotgipa dolrang, project-ni kamrangko maidake ka·enga uarangko nian baksana on·gimin tangkarangko maike jakkalengachim uarangko name nirokna gita man·gen ine committee-rang u·iataha.
Ia chu·gimik tangkarangoni kror 100-ko Central Pollution Control Board (CPCB) aro kror 365.84-ko Meghalaya Environment Protection aro Restoration Fund (MEPRF)-na on·ataha. Ua project-na da·o dipet kror 17,52,34,294-ko CPCB-oniko aro kror 48.47-ko MEPRF-oniko jakkalchina ra·chakaniko on·manaha. Ia janapgimin High Level Monitoring Committee-ko Additional Chief Secretary-ni gadangna komigijagipa a·gipibatgipa officer dilangna nanggen, jeon Finance Secretary, Mining & Geology-ni Secretary baksana ia project-o bak nangpagipa gipin department-rangni official-rangkoba man·chapa.
Ia project-ni kamrangko ka·anio ru·utata, chu·sokatna man·ja ba tangkarangko jakkalsreta ong·ode, uarangni bidingo ta·raken ja·ku de·aniko dakna nanggen aro official-rangan iani doskoba ra·na nanggen ineba Committee u·iatangaha.
Mining aro Geology Department, dongkuenggipa tangkarangko maidake jakkalgen uarangni bidingo chanchirimaniko ta·raken uamangna sokatchina u·iataha, jedakode Meghalaya a·doko songdongenggipa manderangna mongsongbate niamgri koela bikotani a·sel nangchakeako man·giparangna dakchakaniko on·a ia tangka paisarangko name jakkalna man·gen ineba janapataha.
