Shillong, July 9: A·gilsako mikbu-miknenggrikani aro so·sojengjeng ong·anirang gapengon, ka·onanggrikani pal mandeskana ka·sachakaniko, aro ekgrikani pal nangrimaniko basebo ine Meghalaya-ni Education Minister a·dokni chadamberangna mol·molaniko on·aha.
UCC-o North East NSS Festival 2025-o ong·atengmitingo, da·oni a·gilsakko golmal aro jajrenganirangan gape, salantini janggi tanganio an·chi-pari nikani aro kenanian gapgipa ong·a ine Sangma janapaha. Indakgipa somoio, nambatgipa aganchakanide saksa sakgipinna simsake ka·sachakachi re·mikkanganian ong·a ine ua agane, gam-jinrangmangmangde pangkamgipa tom·tomaniko ra·bana man·jawa aro mande ra·grikani gri man·e cha·roroaniara mandeko dingtang dingtang ma·ekanirangona sokata ine ua aganaha.
Jatrangni gisepo ma·sichakgrikaniko ra·bana nanga ine, jat, biap, ba kangal-man·e cha·ako done, damsan ku·mongrimna nanga ine, “An·ching dingtang dingtang biaprangoni re·bagenchimoba, chinga apsan manderang aro a·song apsan-oni ong·a. An·chingko ekgrikatgipana bate an·chingko nangrimatgipaan bilakbata,” ine ua aganaha.
Chadambe NSS volunteerrang baksa agangrikengon, ua uamangko uamangni jatni daka-rika bewalrangna rasong chae dongchina didiaha, aro uko darang doctor ba scientist, ba darangba tarina man·ja ine ua aganaha.
NSS Festival-ara chu·sokna nangaigipasan ong·aija indiba orto gnanggipa – chong·motan dingtang dingtang jatrangni chadamberangko saksa sakgipinoniko skie ra·a aro pangnajolna nangrimaniko ra·baani chol ong·a ine ua talataha.
Uandake, ua chadamberangko uamangni dambemitingni bilrangko namedake jakkalchina, gipinrangna dangdike on·china aro gisiko didianiko man·e dongchina mol·molaha. Filmrang aro kal·susaanirangni golporangko janape, ua gimikan mingsing-minggamaniko man·ja indiba ka·dongani aro dingtanganiko ra·bana on·kanganichisa chu·sokaniko man·a ine aganaha.
Aritifical intelligence bang·baroroengon, technology mikkangchi re·genchimode, mandeni gisikko mamung saloba batna man·jawa ine, “Mamung kol-ba mandeni ka·tongni chanchia, dangdika aro saksa sakgipinko ra·doa gita ong·atna amjawa. Ian an·chingko namen bilakata,” ine ua aganaha.
Na·simang ia video-koba nina man·gen:
Na·simang iakoba poraina man·gen: M’laya-o Shooting kal•aniko nambatatna MoU-o soi ka•a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
