Kharkutta, March 8: Kharkutta Blockni NPP dilgiparang kamtangtangoni ong•katengaha ine da•al Hub newsna seachi u•iataha. Uamangni chittio janapatani gitade Chief ministers Housing Assistance Programmeni chairman aro Kharkutta NPP blockni Committee Shri Marbush G Momin, Sambrak GS circleni CD member Shri Hetchindro D Shira aro Chima A•palni CD member Shri Geoffrey Momin uamangni kamtangtangko watani lekkarangko on•manaha ine u•iataha.

Da•o ong•enggipa MLA Shri Rupert Momin-ni kamrangna suk ong•jae aro uni chu•sokatna nanggnirangko dakjaenganina namnikjae kamoni aro member ong•paaoni ong•katengaha aro gipinrangba ong•kate katkunaba gnang ine uamang janapaha. Unigimin chinga mikkang chango NPPko ia constituencyon man•pilattaina skode sakgipin namgipa dilgipako watatpabo, chinga da•o ong•enggipa MLA baksade kusi ong•jaenga, aro chinga partykode galjawa indiba manderangni aro jolni namgnina dolon dongpae kam ka•angkugen ine uamang janapataha.