Shillong, Aug 3: Khasi aro Garo ku•sikrangkoba Constitution-ni Eighth Schedule-o ra•gatchina gita Meghalaya a•dokni dingtang dingtang dolrangko man•chape, a•dok sorkari aro pilak dilgiparangan dabitokengon, ia dabianiko Trinamool Congress (TMC)-ni a•kanggopengani gimin Budbar salo, National People Youth Front (NPYF) jegalataha.
NPYF-ni dilgipa aro Rambrai Constituency-ni MDC Bajop Pyngrope-ni parakatani gitade, Khasi aro Garo ku•sikrangko Eighth Schedule-o ra•gatani bidingo Parliament-o chanchirimchina gita dabianiko TMC-sa a•kanggope ra•engachim aro ian Meghalaya a•dokni dingtang dingtang dolrangna aro a•doko songdongenggipa manderangna ra•chakna man•gijani ong•engachim.
Khasi aro Garo ku•sikrangko Eighth Schedule-o ra•napchina dabianiko 1992 bilsio, Manipuri ku•sikko Eighth Schedule-o ra•napani somoion a•bachengahachim indiba da•o ia dabianiko TMC dolsa an•tangtang dakdilenggiparang gita a•kangskaenga ineba Pyngrope parakataha.
Khasi aro Garo ku•sikrangko Eighth Schedule-o ra•napchina gita ku•rang on•dilenggipa Tura-ni MP Agatha K Sangma aro Rajya Sabha-ni MP WR Kharlukhi-ko man•chape, Khasi Authors Society, A•chik Literature Society aro uandakgipa dingtang dingtang dolrang aro dilgiparangkoba NPYF mittelpilangaha.
