Shillong, Nov 29: Meghalaya-ni police dolkoila badingsrukanio mongsonggipa jak donggipa ine chanchichipgipa Ahad Choudhury-ko batangimin 25 tarik budbal salo ribhoi District-ni Nongpoh-o rim·aha.
Rim·a man·gipa Choudhary-ko gitcham mamla-rangoni sandidopilna miksonganio East Jaintia Hills-ni Khliehriat police Station-o donenga.
Koila badingsrukanio mongsonggipa jak donggipa ine rim·ako man·a Assam Karimganj District-ni Sutarkandi songoni ong·achim. Bian niamgri koilarangko Meghalaya-oni Barack-ni a·kawe jolon saldilengachim.
Rim·na man·bebeahama ine kobor ra·e nion “Biko adita salrangna skang rim·aha indiba gitcham mamlako Khliehriat-o segata dongani gimin khliehriat police dolrangna pakwate on·enga” ine Ri-bhoi-ni superintendent of police S.P.N Kamare ui·ataha. Apsan dake East Jaintia Hills-ni Superintendent of Police Deepak kumar-ba dosi dakgipa mandeko Nongpoh-oniko Khlieriat-ona watataha ine ui·ataha.
“Da·ode bia chingni ning·on dongenga. Uko sin·sandianirang matchotani ja·mano chinga chu·gimikode ui·ataigen” ine SP Deepak Kumar agandapaha.
Koila badingsrukanio jak dongpagipa saoba manderangni aganani gitade Choudhary baditaba jarangona gimachipe donganiko siahakon inesa uko ma·sitokaijok.
Adita somoirangna skang Meghalaya-oniko Barack a·kawe-ona koila badingsrukaniko knasringe ua jolni manderang koila gate salangenggipa gari truck-rangko dongdipate nanggipa lekkarangko sandion uamango donggijako rim·a man·achim.
Obostani a·bachengani
Batanggimin bilsi 2018-ni July jaon Assam Police choudary-ko rim·e uni nokoniko am·sandianiko dakon uni salantio see rakkigipa lekkao dal·gipa sorkario kam ka·giparang aro politics-o mongsonggipa dilgiparangko nikaha. (Jean una tangka paisa gamachim).
Ua apsan bilsion Meghalayaoni Bangladesh-ona Barack a·kawe gita napake koila salenggipani bidingo central Beureau Investigation (CBI)-na sandianiko dakchina do·ga oe on·ahachim.
Bilsi 2020-ni March Jao CBI Choudary-ni kosako mamlarangko dingtang section-ni ning·o togi cha·bokani, tol·e lekka tariani aro sakgipinrangni janggina kenchakniko dakanio napate segatahachim.
