Shillong, Nov 29: BJP MLA aro Meghalayani Health Minister Pa. A.L.Hek a·doko Inner Line Permitko dabienggipani bidingo maikoba ja·ku ga·paegama maina ma·mongoba BJP dolan Sorkariko rikenga ine sing·anina a·dok Assembly tom·anio uni bidingo monsonganirangko chanchie ra·chake lekkarangko ma·mongni Home Minister Pa. Amit Shah na a·dokni Skotong Minister Dr. Conrad K. Sangma jaktangchin on·eaha, a·dokni namgnina pilak kam rangkon Skotong Minister an dilgipa ong·e dakdilenga aro chinga uko ja·rikskanega ine aganaha.

ILP ko a·doko nangani bidingo kam rangko ka·pana nangnikani ba dabiani chittiko ma·mongna seatgenma ine sing·anina BJP MLA Meghalaya Legislative Assembly tom·anion uko ra·chakmanjok aro lekkarangko on·manjok uni gimin seataina nangjawaha ine aganaha.

Skotong Minister an gari salgipani asongchakanio asonggipa ong·a aro chingara uni sepango asongchape re·pagiparang gita ong·a. Gariko ua jechi sala uchin chingaba damsan re·paa, Prime Minister ko grongna re·angode chingaba un baksaan, Home Minister Pa. Amit Shah ko grongeoba un baksaan. ILP ko a·doko ra·gatna neng·nikani bidingo ma·mongko saksangrik grongegenma ine sing·anina Pa. Hek, gari salgipani asongchakanio kragipa salgipaan donga aro chinga ku·cholsan ong·e daitoko ra·a ine aganskaaha.