Kabul, Nov 29: Official ja·pangoniko koborrangko man·soani gita, iana skangrango a·sel ong·giparangoni namjabatgipa chadrapaniko daktaianio, Afghanistan a·songni ge·sa army-rangni a·tipko da·al Robibaro pringo bom donchapgipa garichi chadrapanio komibeoba sak 30 na baten chelchakgipa dolni sipairang so·ota man·aha aro bang·a gipinrang bilongbee jokkom ong·tokaha.
Ia a·sel-obostara, Taliban aro sorkarini sipairangni gisepo dakgrikani jringnan ong·simaigipa Ghazni-ni salaramchipakgipa province-ni skotong songjinmani a·palo ong·aha.
Kangal a·songo batanggimin chasong-gnirang ong·na am·pile sorkari aro Taliban-ni gisepo dakgrik-ding·grikraranichi hajalni hajal manderangni janggirang nisiatako man·pilaha, jekon da·o bon·atna gita Afghan sorkarini seoke watata man·giparang aro Taliban-ni gisepo agangrikanirang on·engmitingo gital obosta ong·gitiktaiaha.
“Chinga, da·odipet sak 30 na batani manggisirangko man·soaha aro sak 20 na baten gipinrang bilongbee mata-bu·a man·tokaha aro uamang gimikan chelchakgipa sipairang ong·tokachim,” ine Ghazni hospital-ni director, Baz Mohammad Hemat koborna agan-talataha.
Da·odipet, sigipa manderangni manggisirangko man·soa gimikko talatengon, provincial public health director-ni agantimgipa, Zahir Shah Nikmal, mande sia gimik haida tang·dokunaba donga ine koborna u·iataha.
Da·odipet, ia gopretataniko darang doloniba a·kangata dongkuja.
Interior Ministry-oni agantimgipa, Tariq Arian-ni aganani gita, da·al pring 7:37 bajimango gopretgnigipa bosturang gapchipaigipa gariko army-rangni a·tipo gopretatani ja·man an·tangko on·kange chadrapgipa saksa so·ota man·aha.
Skang atchu-ambini chasongoni Buddhist toromoniko man·rikrikbagipa biap ong·e namen mingsinggipa biap ong·a baksana gipinrangoni ma·eke baditaba bilsirangna kingking tom·tome dongbagipa Bamiyan jillako changgni dake bomrangchi chadrapaniko dakangani, jeon mande sak 14 mangni gita so·ota man·aha, uani salgnirang ja·manon da·al pringo Ghazni-ko chadraptaiani ong·aha.
A·songo tom·tomaniko ra·bana gita Taliban aro sorkarini manderangni gisepo mija September jani 12 tarikoni a·bachenge Qatar-o agangrikaniko dakani ja·man golmalrang ong·baenganio da·al Robibar pringo gario bom donchape chadrapanian Afghanistan a·songko bilake chadraptaianiba ong·enga.
