JOWAI, Nov 29: Salaram Jaintia Hills district-ni Sutnga Elaka-ni ning·ogipa Soo Kilo biap jolo IED bomko gopretatanio a·jolni police, iani bidingo Khliehriat police station-o dosi on·e mamlako segatangaha.
Joa kal·a aro minggipin ong·gija kamrangko ka·atenganina mikrakataniko on·aniko elaka-ni Dolloi-ni knachajani gimino Sookilo anti-bajar biapo IED bomko dape gopretataha ine champengata man·gipa Hynñiewtrep National Liberation Council (HNLC) bobil dol mija Sukrobar salo a·kangaha.
Assistant Inspector General of Police (A), Gabriel K Iangrai-ni mijal Sonibaro koborna seachi u·iatanggipao indake janapataha, “Khliehriat Police Station-ni ning·o dosi on·e mamlako segataha aro obosta ong·anggipako agangrikaona re·bagijagipa HNLC bobil dolni general secretary cum publicity secretary-ni a·kanganio talbate ma·sina gita mamlako sandirokatanikoba a·bachengataha.”
Iangrai aganaha, Mija November 26 tarikni pring 3:20 bajimango Sookilo songo donggiparang maiba gopretani gam·ako knatokaha ine ua songni nokmaoniko koborrangko man·soaha ine Iangrai aganaha.
“Songni manderang aro dokan dakgiparangni obosta ong·gipaona re·ange nion gopretanichi Sookilo songni anti-bajar cha·ramo rikgipa cha·ani palgipa dokan ge·sani chu·gimik nosto ong·ako niktokaha aro anti cha·ram biap gimikchinan gopretanichi tang·pipraanikoba niktokaha,” ine ua janapataha.
Obosta ong·gipa biapona district-ni gipin chua gadangni officerrang aro Superintendent of Police bakbakan re·ange nirokeaha ine u·iatengon, bomko sandigipa aro uko nisiate galgipa dolni dakchakanikoba am·aha aro gopretani ja·man sandiatanirangko dakataha ine Iangrai agandapaha.
Uni aganani gitade, obostao darangni a·sel ong·anikoba knasoa dongjaha aro gopretanichi sambajolni dokan nokrango bang·gija nosto ong·anirangkosan nikna man·aiaha.
