Tura, March 16: All Garo Hills Govt Lower Primary School Contractual Teachers’ Association (AGHGLPSCTA), Mongolbar saloni Butbar salona konta 24 okgimu chake jingjengataniko Tura Willam Point-o a·bachengataha.
Lower Primary School-rango contract-o skie on·enggiparangni kamko a·dok sorkarini bon·atengani gimin apsan kamo skigiparangko rakkipiltaichina aro Meghalaya Teacher Eligibility Test (MTET) porikkako re·anggipa 2019 bilsio changsa mangmang ong·ate, gital porikka segiparangko 90 percent, kam ka·soenggipa skigiparangko 10 percent-san pass ka·ate bilsi ru·ute kam ka·soenggipa skigiparangko kam bon·atahani gimin gitcham skigiparangna dingtangmancha MTET porikka seaniko changgni ba changgittamna porikka ra·piltaichina a·dok sorkario dabiangenba AGHGLPSCTA, salgnina okgimu chake jingjengataniko a·bachengataha.
“Re·anggipa 2019 bilsio changsa mangmang MTET porikka segiparangoniko 60% mark man·giparangko pass ka·atahani giminba gitcham skigiparangna 45% mark-rangko on·skachina dabie re·anggipa bilsini December jao jinma re·jomaniko ong·atahachim, indiba a·dok sorkari skigiparangni dabianiko knachakjahani gimin chinga da·alo okgimu chake jingjengataona sokaha” ine AGHGLPSCTA-ni jakrikra Rakman A. Sangma koborna parakataha.
“Chinga da·alo maiko dake janggi tanggen aro dedrangko maidake aldugen, chinga indita bilsirang songni nokni bi·sarangna bimchipe skie on·ahachim, indiba chingni kamko sorkari chu·ongnikja aro onchepe ra·aha. Chinga da·ode bilsirang re·angahani gimin gipin department-rangoba kamko man·jawaha, sorkarini kal·stekako man·e chingni janggi tanganide kam gri ong·e bon·aignok. Bi·sarang okkrie grapoba maiko dake uamangna cha·aniko ra·bae on·kugen, siana agre chingo maming gipin cholrang dongjaha,” ine skigipa saksa an·tangni suk ong·gijaniko parakataha.
Indake ong·engon, skigiparangni dukko ma·sichake skigiparangna apsan kamko ka·na gita cholko on·piltaichina skotong minister Pa Conrad Sangma-ko mol·molangan baksa MTET porikkako uamangna setaina cholko on·kuchina gitaba skigiparang, a·dok sorkario mol·moldapangaha.
