Guwahati, Mar 7: Assam a•doko songdongenggipa manderang achak be•enko cha•ronga ine Maharashtra Assembly-o janapahani gimin Maharashtra a•dokni MLA Bachchu Kadu-ni kosako Assam a•dokni Congress dol, Dispur police station-o FIR ka•doangaha.
FIR-ko Assam Pradesh Mahila Congress-ni general secretary Banashree Gogoi ka•doangaha aro uni FIR-o janapatani gitade, re•anggipa March-ni 4 tariko Maharashtra a•dokni Achalpur constituency-o Janashakti Party-ni MLA ong•enggipa Bachchu Kadu, Assam a•dokni manderang achak be•enko cha•giparang ong•a ine Maharashtra Assembly-ni chairperson aro dingtang dingtang dilgiparangni mikkango parakatahachim.
Uni iandake agananiko social media-rango manderang niksoengahani gimin ian unasan ong•aigija Assam a•doko songdongenggipa pilak manderangnan namen ong•sianiko ra•baani gita ong•enga aro ian Assam a•doko tom•tome songdongenggipa manderangni gisiko so•sojengjeng ong•ataniko ra•baani gita ong•enga ineba Gogoi, FIR-o parakataha.
Legislative Assembly-ni saksa membor ong•e, Assam a•doko songdongenggipa manderangni kosako iandakgipa kattarangko agananichi Bachchu Kadu, Indian Constitution-ni Article 173 (A)-ni ning•o dongimin niamrangko pe•aha ineba ua ia MLA-ni kosako nanga gita ja•kurangko de•china didiataha.
