Manipur, June 13: Manipur a·dokni mongsonggipa bobil dol, People’s Liberation Army-ni dilgipa Ibotombi Meitei, nama ramao janggitangna miksonge Skotong Minister N Biren Singh-ni mikkango an·tangko bame on·aha.
Skotong Minister N Biren Singh aro a·dokni Chief Secretary Rajesh Kumara, DGP P Doungel, Ibotombie Meitei-ni bame on·aniko rimchaksoengon un baksa ja·rikgiparangoni sak 14 bobil dolni sipairangba bame on·aha.
Bilsi 56 ong·gipa Ibotombi bame on·a skang People’s Liberation Army dolni Health And Family Welfare-ni Deputy Assistant Secretary ong·engachim. Ua 1995 bilsirangonin bobil dolo napaha ine kobor-na ui•ataha.
Ibotombi ma·mong aro a·dok sorkarini Manipur a·dokna on·kange kam ka·enganiko nike nama ramaona re·baaha aro Manipur a·dokni ning·o sorkarini kosako chakatenggipa bobil dolrangkoba tom·tome janggitangani ramaona re·bae apsan kam ka·rimna re·bachina mol·mola ine Skotong Minister N Biren Singh kobor-na aganaha.
