Imphal, Jan 5: Budbar salo, Manipur a•dokni Thoubal a•ja ning•o donggipa Lilong Usoipokpi Sangomsang jolo bilakbegipa Improvised Explosives Device (IED) bomako ronggniko gopretanio Assam Rifle dolni sipai saksa so•otako man•aha aro sakgipin saknaanirangko man•skaaha ine police-rang u•iataha.
Police-rangni u•iatani gitade, ia a•briarigipa biapo 16th Battalion Assam Rifles-ni sipairang, re•roroe nirok sandianirangko dakengmitingo aro mitam sipairang chi saldogipa pumo sambao neng•takengmiting somoio ia bomarangko gopretaha.
Boma gopretanio Assam Rifles-ni sipai L Wangshu so•otako man•aha aro unbaksa kam ka•rimgipa sipairangoni saksa saknaaniko man•ahani gimin uko sepango donggipa hospital-ona bakan ra•angaha ine kobor on•aha.
Ia a•sel ong•ani ja•mano joltangni MLA Antas Khan aro police official-rang bakan ua biapona re•angaha.
Manipur a•doko da•o February-March jani gisepon election-ko ong•atengani gimin bobil dake chakatgipa dolrangni so•sojengjeng ong•atanirangko nikna man•taiengahachim.
