Shillong, May 5: Manipur a·doko so·sojengjeng ong·enganichi Manipur-o poraienggipa aro dingtang dingtang kamrangko ka·enggipa Meghalaya a·dokni manderangna kenchakna nangani ong·engani gimin Manipur a·doko jachange dongna nangenggipa manderangko rimongkatbana gita Meghalaya sorkari, helpline-ko a·bachengate, special flight-rangko jakkalenga.
Koborko on·ani gitade, Manipur a·dokni Agriculture University-o poraienggipa sak 50 chatro chatrirang, Food Technology Institute-ni sak 10 chatro chatrirang, Lajong Football dolni sak 25 memborrang aro gipinrangko man·chape, Manipur a·doko jachange dongna nangenggipa manderangko Meghalaya sorkari, dingtangmancha aeroplane-rangko tik ka·enba, a·doktangona rimbapilenga.
Manipur a·doko jachange dongna nangenggipa Meghalaya a·dokni manderangko, ia special flight-rango rimongkatbana gita Meghalaya sorkari, PMO, Home Affairs Ministry, Assam Rifles-ni DG, Civil Aviation Ministry aro private airline-rang baksa agangrike dingtangmancha aeroplane-rangko tik ka·na man·aha.
Sukrobar saljatchiona kingkingde, Manipur a·doko jachange dongenggipa sak 25-na baten a·dokni manderang, dingtang dingtang aeroplane-rango Guwahati gita Meghalaya a·dokona re·bapilengaha ine kobor on·timgiparang u·iataha.
Ia aeroplane-rang baksana dingtangmancha tik ka·gimin bus garirangoba sak 60-na baten chatro chatrirangko Meghalaya a·dokona salbaengaha ine kobor on·aha.
Indake ong·engon, dakchakanirangko nangenggipa manderangna Meghalaya sorkari, dingtangmancha helpline-koba a·bachengataha aro ia helpline nomborara 1800-345-3644 ong·a. Dakchakanirangko nangenggipa manderangde ia helpline nomborona ka·ate dakchakanirangko bi·atna gita man·gen ine kobor on·timgiparang u·iataha.
Maiba dakchakanirangko nangenggipa Agriculture aro Food Technology-ni chatro chatrirangde, Nodal officer Shri Remdor Dkhar-na 91 98631 14387 nomboro aro Dr. Paul Chyne-na 9863089972 nomboro ka·e dakchakanirangko ba sing·sandianirangko dakatna man·gen.
Manipur a·doko jachange dongna nangenggipa Meghalaya a·dokni manderangko rimongkatbana kamrangko ka·anio, Meghalaya sorkarini Minister Dr Ampareen M Lyngdoh, Political Secretary aro Chief Minister-ni OSD Shri Daniel Thangkhiew aro West Garo Hills a·jani SP Dr Vivekananda Singh Rathore, Manipur a·dokni skotong Imphal songjinmaona re·angaha.
Manipur-o jachange dongenggipa manderangko rimongkatbana gita sorkarini kamrangni bidingo Meghalaya a·dokni Chief Minister Conrad K Sangma talatangengon, “Manipur a·doko jachange da·o a·doktangona re·bapilna sikenggipa manderangko chinga dingtangmancha permission-ko ra·e aeroplane-rango rimbapilengaha. Lajong Football dolko da·o airport-ona police-rang dilataha aro chingaba a·dokni pilak manderangkon tom·tomao aro somoi gita sokatbana pilak kamrangkon ka·enga. Manipur a·doko poraienggipa chatro chatrirangko aro uamangni ma·a paarangko kenjagokjachina anga didienga. Chinga ma·mong aro gipin a·dok sorkarirang baksa nangrime kamrangko ka·enga aro an·chingni manderangko tom·tomao sokbapilatna gita pilak chel·chakanirangko on·enga,” ine parakataha.
