Shillong, May 6: Manipur a·doko so·sojengjeng ong·enganichi Manipur-o poraienggipa aro dingtang dingtang kamrangko ka·enggipa Meghalaya a·dokni manderangna kenchakna nangani ong·engani gimin Meghalaya sorkari, skotong Minister Conrad Sangma-ni dilanichi, jachange dongna nangenggipa manderangko rimongkatbana gita kam ka·aha.

Jachange dongenggipa chatro-chatrirang, Sukrobar walo Guwahati Airport-ona sokbaaha aro uamangko Meghalaya sorkarini manderang rimchaksoani ja·man, cha·ani ringanirangko on·e, bus gario Tura aro Shillong-ona salangaha.

Manipur-o poraienggipa chatro saksa Joyselman D. Sangma, Hub News baksa agangrikengon, maikai uamang konta 36-na kenjagoke dongna nangahachim uarangni gimin talataniko on·angaha aro uamangko Army-rangni Imphal Airport-ona naljoke dilbaahani gimin Army-rangko mittele, Meghalaya sorkarini dilgiparang, chong·motan Ampareen Lyngdoh, Marcuise N. Marak, Rakkam A. Sangma aro gipinrangni uamangko nichaksoe pilak dakchakanirangko on·ahani gimin Meghalaya sorkarikoba mittelpilangaha.