Shillong, May 30: National People’s Party (NPP)-chi dilenggipa MDA sorkari, kamtango chu•sokgipa ong•jaha aro a•dokna namgijakosa ra•baaha ine nikgenchimode United Democratic Party (UDP) dol, MDA-oni ong•katna kenna nangjawa ine Sombar salo, NPP-ni national vice president aro Meghalaya a•dokni Deputy Chief Minister Prestone Tynsong parakataha.

Meghalaya a•doko President’s Rule-ko ra•gatna kenengani giminsa UDP, MDA sorkario bakrimaniko watkujaenga ine UDP-ni aganahani gimin a•dokni Deputy Chief Minister, ia kattarangko aganskaaha.

MDA sorkarini ning•o a•dokna kenchakna nangani donga aro ia sorkari a•dokna namgijako ra•baaha ine nikenga ong•ode UDP, President’s Rule-na kenna nangjawa ineba Tynsong parakataha.

Sorkarini gita a•dokni namgnina ja•kuko de•engon, pangnan MDA-o bakrimgipa dolrangni tom•anio aro MDA sorkarini coordination committee-ni tom•anio chanchirimchengronga ineba Tynsong parakataha.

“Ching baksa bakrimenggipa dolrang kusi ong•jaenga ong•ode anga mamingkoba dakna man•jawa aro NPP-de namgipa dol ong•ja ine agangenchimoba anga mamingkoba dakna man•jawa. Chingade a•dokni manderangonasa re•angpilna tariaha,” ine Tynsong aganaha.