Tura, Apr 7: North Garo Hills a·jani Kharkutta Police Station-ni ning·o donggipa Chotcholja songni bilsi 32 ong·gipa Selbina N Sangma, an·tangni bilsi 7 ong·gipa demechik baksa nokoni kate gimaenga ine nokdangni manderang kobor on·aha.
Iani bidingo u·iataniko on·atengon, ia me·chikni mobile phone-ba switch off ong·enga aro uamang ma·ningsani bidingo da·o dipet maming kobor dongkujaenga ine me·chikni abitang Tesalin N Sangma parakatenba, uamang ma·ningsakon nokona re·bapilchina mol·molataha.
Koborko on·ani gitade, ia me·chikma re·anggipa April 2 tarikonin an·tangni demechikgipa baksa nokoni kataha aro untalan uamangni gimin maming kobor dongkujaengachim.
