Senokgipa: Chingreela A. Sangma
Tura, April 24: India a·song a·bachengbaonin manderangko mikkang nitea gri, gimikni namgninan kam ka·na rikdilgipa a·song ong·a (Equality). Ian India-ni Niam-Bidiko (Constitution) kotokna segimin gita, kakket bichal (Justice), songsul, a·songni namroro-silroroani, chanchibewalanio bak ra·ani (Politics) aro bakrimani (Fraternity) ba uandakgipa niam-pangchakanirangko dingtangatna miksongpaa.
Da·ororo India aro Meghalaya-ko niatgenchimode, an·ching nok-jam, rama jal·ang aro gipinrangko rikani kamrangko nikna man·enga indiba an·chingna niam ki·tapo on·gimin bilrangde salantian bilgriroroenga. A·songko silroro-namroroatna dingtang dingtang daka-rikani kamrangko ka·anio gualani dongja, indiba niam bidikni mongsonggipa niamrango pangchake chu·gimik dingtanganiko ra·baanisa dal·batsranggipa kam ong·a.
Ia kattarangni ortoko niatna: Reform (Nambatatani) chong·motde chasongni dakbewal-rikbewalrangko dingtangatgija kamrangko namdapatanikosa miksonga. Transformation (chu·gimik dingtangatani) chong·motde an·chingni daka-rikani cholrangko dingtangate, songalko chua gadangona de·doaniko ra·baanikosa miksonga. Development (namroro-silroroani) chong·motde tangka-paisa, rama-jal·ang, skie-ra·ani an·seng-baljokani ba uandakgiparangchi manderangni janggi tanganiko mikkangchi ra·doatanikosa miksonga. A·gilsakni bakantion namroro-silroroani apsan ong·gijaniko an·ching nikna man·a; maina bang·a a·songrangni gam-jinrangko bilakgipa a·songrangchi ra·seka man·enga. Iani a·sel tangka-paisani gita dingtanggrikaniko ra·baenga.
India a·dokrangni gisepo Meghalaya tangka-paisani gita neng·nikaniko man·enggipa a·dokrangoni ka·mabatao gittamgipa ong·enga. An·chingni a·doko gam-jinrang bang·en donggenchimoba uarangko chalaiani bilde saksa-sakgni manderangni jakosan dongaia. Ian manderangna sinjetaniko aro bang·a obosta, neng·nikanirangko ra·baenga. Unbaksana an·seng baljokanio, lekka-porao aro nambate janggi tanganio Meghalaya namen ja·manchakrikenga. Unigimin, niam bidiko sesogimin gita chu·gimik dingtangataniko ra·baanisa an·chingni miksongani ong·na nanga.
An·chingni kam ka·ani bewalara gitcham British chasongni gita ong·na nangjaha, jeon A·chik manderangni man·na nangani gam-jinrangkoba chansokpilgija seke ra·achim. Iana agreba, Meghalaya a·dok a·palchinikosan tang·dodapataniko ra·baaigipa mangmang ong·na nangja, indiba niam bidikni mongsonggipa niamrangko mangrakatanisa uni skanggipa chanchiani ong·na nanga.
Meghalaya-ni dakbewal rikbewalrang gipin a·dokrangoni namen dingtanga ine an·ching u·ia, jeon ma·chong aro gam-jinrangko man·rikani ma·gipa ba me·chiksa ong·a. Indiba, ia dakbewalrang donggenchimoba, local council-o songsalko ra·doani gimin katta naatanirango me·chikrangna bakrimani cholrangko on·kujaenga. Unigimin, dingtang dingtang me·chik dolrang (organisations), local council-o me·chikrangni bakra·aniko dabiatenga, maina indakanichisa niam bidiko miksonggipa chu·gimik dingtangataniko ra·bana man·gen.
Ia dingtanganiko ra·bana gitade an·chingni political a·bako dingtangatna nangchenggen. Seokgimin dilgiparang, jemangan chanchirimna aro ku·patiani bil donga, uamangni dilanichisa namgijako pangpike namako dakdilna man·gen. India a·songara manderangnin, manderangchin, aro manderangnan rikgimin democracy ong·ani gimin, dilgiparangko seokani bilba an·ching ramram manderangni jakon ong·a.
Bon·kame, a·songni aro songsalni nangana kam ka·aniara Development aro Transformation ia minggniko apsan ranta ka·achisa ong·a. Transformation (Parivartit) ba ‘chu·gimik dingtangataniko’ ra·bagija Development (Viksit) ba ‘namroro-silroroani’ mangmangko ra·baaniara “kana aro kora” gitasan ong·aia. An.chingni a·dokni miksonganira dal·ro-silrorona aro dingtanganiko ra·bana apsan bakrime kam ka·anisa ong·na nanga jedakode saksa mandeni jakosan bil ong·aigija pilakan apsan kamko suale ka·na man·gen.
Na·simang iakoba nina man·gen:
Na·simang iakoba poraina man·gen: A•ba so•anian wachina skang balgipa balwa namgijako Salgro-salaram jolo 27% ong•ata ine am•sandianio nika
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
