Resubelpara, Apr 24: Indian Oil Corporation Limited (IOCL)-ni Corporate Social Responsibility (CRS) program-ni ning•o be•enni gita cholgri ong•gipa manderangna aro budepa butchumarangna dingtang dingtang dakchakani bosturangko suale on•na gita Sukrobar salo, dingtangmancha program-ko North Garo Hills a•jani Resubelpara-o donggipa Multi Purpose Cooperative Society Hall-o ong•atangaha.
Ia program-ko IOCL, North Garo Hills a•jani District Administration aro District Social Welfare Office (DSWO) baksa nangrime ong•atangaha aro ia program-o a•dokni Cabinet Minister aro Resubelpara-ni MLA Timothy D Shira, mongsonggipa sokgipa ong•e, be•enni gita cholgri ong•giparangna aro budepa butchumarangna bosturangko suale on•angaha.
Dingtang dingtang bosturang, jekai motorchi chalaigipa tricycle, wheelchair, hearing aid, crutch, walker aro uandakgipa bosturangko ia program-o be•enni gita cholgri ong•gipa manderangna aro budepa butchumarangna sualataha aro ia bosturangko North Garo Hills a•jani dingtang dingtang biaprangoni gimik sak 584 manderang man•aha.
Ia program-ko ong•atanio, a•dokni Cabinet Minister aro Resubelpara-ni MLA, jinmana aganprakangengon, be•enni gita cholgri ong•gipa manderangna aro budepa butchumarangna iandakgipa bosturangko indin suale on•angahani gimin IOCL-ko mittelpilangaha.
North Garo Hills a•jao be•enni gita cholgri ong•gipa manderangna aro budepa butchumarangna dakchakanirangko on•na gita assessment camp-rangko ong•ate, bimingrangko segatahani gimin ua District Administration aro DSWO-koba mittelpilangaha.
Ia ja•kuko de•anichi, be•enni gita cholgri ong•gipa manderang aro budepa butchumarangni janggi tanganio, bang•en namgnirangko man•gen ineba Shira, an•tangni ka•dongchakenganiko parakangaha.
Be•enni gita cholgri ong•gipa manderangna janggi tanganiko altubatatna gita dingtang dingtang dakchakani bosturangko tarie on•engani gimin ua, Artificial Limbs Manufacturing Corporation of India (ALIMCO)-koba mittelpilangaha.
Ia tom•anio, North Garo Hills a•jani Deputy Commissioner Dr Abhishek Saini-ba jinmana aganprakengon, songsalo bilgrigipa manderangni namgnina sorkarini aro district administration-ni ka•enggipa kamrangni bidingo agan-talatanirangko on•angaha.
Dakchakanirangko nangenggipa manderangna sorkari aro district administration, pangnan do•gako oe donenga ineba Dr Saini aganaha.
Ia program-ko ong•atanio, IOCL-ni Chief Manager Malati Malakar-ba tom•anio bak ra•giparangna aganprakengon, IOCL-ni kamrangara, garirangna petrol-rangko aro nokdangrangna LPG-rangkosan on•enga ong•ja indiba songsalo dakchakanirangko nangenggipa manderangnaba ma•manti bosturangko on•gilanichi, India a•songo namdapatna kamko ka•paenga ine aganaha.
Na·simang iakoba nina man·gen:
Na·simang iakoba poraina man·gen: Meghalaya-o namroro-silroroani (Vikshit) aro chu•gimik dingtangatani (Parivartit)
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
