Williamnagar, July 21: Garo Hills, uni ku·rang nambatgiparangoni saksako gimaatanina da·asalo dukniko man·enga. Mingsinggipa film, git tarigipa, git ring·gipa aro actor Cellington Marak, lung cancer-ko man·e Guwahati-ni ARHI hospital-o sanna-bananiko dakengon, pringni 8:50 bajimango a·gisakko wate re·angaha.
Cellington Marak 2005 bilsio Nokdango Ka·sani minggipa ge·sa fim-ko tarie a·bachengaha. Ua 2007 bilsio, Take My Love, music video-ko tariaha, jekon Garo Hills bang·a manderang namniktokaha. Uni knatogipa ku·rang aro uni melibegipa ripeng Mandrake M. Sangma-ni tarigimin doka-dam·ani, ua somoio chadamberangni gisepo ia git namen mingsingbeaha.
2011 bilsio ua film tarigipa Simon George S. Marak-ni film, Parakjajok Maina-ko tarianioba dakchakaha. Ua Editor aro Assistant Cinematographer-ni kamko ka·ana agreba, doctor-ni bakko ra·e ia film-ni actor-ba ong·aha. Uasan ong·aija, ua film-ni namen mingsingbegipa git “Gimangaha balwa baksa mikjapsaon miksonga” git-koba ring·aha. Uni knatobegipa ku·rangchi ring·anian ia git-ko film-ni gualna amgijagipa bak ong·ataha.
2018 bilsio Cellington aro Mandrake M Sangma bakrime Take My Love 2-ko tariaha aro iakoba Garo Hills-ni manderang namnike ra·chakaha. Changsatai, ia git-koba ua ring·aha aro Mandrake doka-dam·aniko tariaha.
Uamang sakgni December 2019 bilsio Take My Love project-ni ningo Destiny of Love-ko bakrime jawilwatko tariaha. Ia video namen mingsingaha aro YouTube-o 3.7 million manderang niaha.
Uni siani somoio uni bon·kamgipa project A·sel-ko taria matchotkujaengachim. Bang·a manderangan ia film-ko nichaksotokengachim. “Chinga uko gisik ra·na aro chingni ka·saani aro mande ra·aniko mesokna ia project-ko jedakeba matchotatna jotton ka·gen,” ine uni melibegipa ripeng Mandrake M. Sangma Hub News-na aganaha.
Garo film aro music industry-o Cellington Marak-ni on·gilaniko mamung saloba gualjawa. Uni changa-sapanni, ku·rang aro uni kamrang chasongni chasongna ong·gen.
Na·simang iakoba nina man·gen:
Na·simang iakoba poraina man·gen: Shillong Medical College, NEHU Affiliation-ko man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
