Shillong/Tura, April 7: A·gilsakni manderangna Jisu Kristoni duk chake chisolo sianiko gisik ra·na gita Sukrobar salo, Meghalaya a·dok gimikon Kristian bebera·giparang ‘Good Friday’-ko maniangtokaha aro ia Rongtalgipa salko manianio pilak ma·malni torom nokrangon manderang jinma olakkianiko aro apsan bi·rimanirangko dakangtokaha.
Shillong songjinmao Mary Help of Christians-ni Cathedral gilja noko ritchani ritcha Catholic bebera·giparang, Jisu Kristoni duk chake chisolo sianiko gisik ra·na gita apsan Isolko olakkiangan baksana apsan bi·rimanirangkoba dakangaha.
Garo Hills-oba Baptist aro Catholic mondolirangko man·chape dingtang dingtang ma·malni Kristian bebera·giparang, ia Rongtalgipa Sukrobar salo, an·tangtangni gilja nokrango Nokgipa Isolko olakkiangan baksana apsan bi·rimanirangko dakangaha.
Tura Baptist Mondolini gilja noko jinma olakkianiko dakangengon, Sikkim a·dokoni re·bagipa Reverend Mathias Subba, Isolni namgipa kattarangko aganprakangaha aro uni English ku·sikchi aganprakaniko Tura Baptist Mondolini Pamong Rev Stafford K Sangma, A·chikkuchi pe·e on·angskaaha.
Tura-ni Sacred Heart gilja nokoba ia salo Isolko apsan olakkirimna gita hajalni hajal Kristian bebera·giparang tom·chimongtokaha aro uamangna Catholic Pamongrang, Isolni namgipa kattarangko agane on·angan baksana Isoloba bi·chakangaha.
Ia Good Friday ba Rongtalgipa Sukrobar salara, bilsi 2000-na skang, Jisu Kristoni duk chake chisolo sianiko gisik ra·na gita manirongenggipa sal ong·a. A·gilsakni manderangko jokatna gita Jisu Kristo a·gilsakona re·bae an·tangni janggiko on·kangaha aro uko bebera·gipa mande sakantian jokataniko man·skaa ine Kristianrang bebera·e ia salko bilsiantian manirongenga.
