Shillong, Nov 22: Mongolbar pringo, West Jaintia Hills a•jani Mukroh songo, Assam police aro Forest guard-rangni skatang goanichi a•dokni sakbonga manderang janggitangtangko gimaatna nangahani gimin Meghalaya a•dokni BJP MLA aro Cabinet Minister Sanbor Shullai, Assam police-rangni kamko jegalenba, Assam a•dokni Chief Minister Himanta Biswa Sarma-na sedoataha.
Ia a•selni bidingo ta•raken ja•kuko de•china gitaba ua Assam-ni Chief Minister-ko didiataha.
Iani bidingo Assam-ni Chief Minister-na sedoatengon, ia a•sel ong•aniko Assam police aro forest guard-rangni ka•saninggija dake so•otani ine aganna man•gen aro ia a•sel ong•aniko Meghalaya a•dok gimikon jegalgrimtokenga ine Shullai parakataha.
A•dok damgnini simarango iandake Assam police-rang bilrangko jakkalrongengani a•selan sima jolrango songdongenggipa Meghalaya a•dokni manderang kenchipchipe janggi tangna nangtokenga ineba ua parakataha.
A•dok damgnini sima jolrango songdongenggipa manderangko Assam police-rang, gipin a•songni manderang gita jakkalna man•ja ine janapatengon, Assam sorkari tom•tomani gnanggipa salgro salaram jolko nangnikenga ong•ode, saksa adatang dal•batgipa gita mesokna nanga ine BJP MLA parakataha.
